Virus di Hospital
Methicillin-resistant Staphylococcus aureus (MRSA) mihó konosí komo e vírus di hospital, ta un bakteria masha ferfelu ya ku e ta resistente kontra mayoria antibiótika. Pa tal motibu e ta peligroso pa gruponan di riesgo, muhénan na estado, 50plussers i muchanan. E por presentá tambe serka hendenan ku ta bon di salú pero den mayoria kaso no ta duna muchu molèster. E síntomanan di e bakteria aki ta dependé di unda bo a kontraé esaki.
Generalmente e ta kousa infekshonnan leve riba bo kueru, manera postema òf bral, pero tambe e por kousa infekshonnan mas grave, manera pulmonia i e por ta hopi peligroso pa pashèntnan ku a kaba di hasi un operashon. Debí ku e ta difísil pa trata pa su resistensha kontra (sierto) antibiótikonan, e vírus aki sa wòrdu yamá “super vírus”.
Kon bo por hañ’é?
Dor di aire i dor di ta den kontakto físiko direkto, (p.e. via man òf opheto kontaminá) i speshalmente den/rònt di un hospital. Hendenan ku ta traha den krio di bestia, speshalmente porko, tambe por ta portadó di e vírus aki. Mester tin kontakto regular pa por sinti e síntomanan si.
Kon por prevení esaki?
Dor di laba man konstantemente, sigur si ta trata di hende ku ta traha den hospital òf ku hende malu i tambe esnan ku ta traha den krio di bestia (porko). Esun ku ta bishitá un familiar kontaminá den hospital, ta rekomendabel pa tapa boka ku un kapa i desinfektá ku alkohòl. Despues ku sali hospital, laba e pañanan, apart, ku bon desinfektante.
Durashon: difísil pa pronostiká
E pashènt por sintié un par di dia malu, pero e bakteria mes si por keda kologá mas largu den aire. E bakteria aki ta “biba” serka hende malu, pero por tin hende portadó ku ta salú tambe. Esaki kier men ku talbes e portadó mes no ta sufriendo di e vírùs, pero si por infektá otro hende kuné. Duna un hende man ya por ta sufisiente pa pasa e bakteria pa un otro hende. E mihó konseho ta: laba man konstante i limpia i desinfektá konstantemente, si bo tabata den kontakto ku un persona infektá.
Vírus i Bakteria,
NO duna nan un chèns!!