Den e edishon aki di Konsumidó Alertá nos ta pone hopi atenshon na e Lei di Kompetensia. Di nos parti nos ta orguyoso di semper tabata un di e organisashonnan eksponente ku e último añanan a bringa pa e lei aki keda aprobá. E siguiente trayekto lo ta pa sigui bringa pa e instituto ku mester implementá e lei aki keda lantá. I alabes sigui ku e otro konseptonan di lei ku nos a pone riba agènda di nos organisashon i di nos komunidat.
Nos ke traha e aña aki riba kalidat di produkto i servisio ku nos ta saka nos plaka i paga pe. Si nos komo laiko no por konfia ku un produkto òf servisio ta di e kalidat ku nos ta spera, loke hopi biaha ta wòrdu prometé dor di e bendedó, nos mester tin kaminda pa kana pa haña restitushon di daño ku nos a sufri.
Lamentablemente ta tiki ta e komersiantenan ku ta atmití ora e bende un produkto dañá òf si e servisio ku e ta bende no ta nada manera esun ke el a hasi propaganda pe. Ya na aña 2014 Fundashon pa Konsumidó a entregá na Ministernan di Hustisia i Desaroyo Ekonómiko un konsepto di Lei pa yega na un Korte di Konsumidó. E aña aki Fundashon pa Konsumidó lo bai hasi su máksimo esfuerso pa yega na tratamentu di e lei aki.
E Korte di Konsumidó den realidat no ta un konsepto di lei nobo pero mas bien adaptashonnan chikitu na leinan eksistente pa hasi posibel pa un konsumidó por yega Korte di Hustisia ku su kaso sin muchu gastu i molèster. E konsumidó no mester di buska i paga un abogado ku lo salié hopi plaka. I hustamente esaki ta un di e motibunan prinsipal di e retraso den e lei aki. Di parti di órden di abogasia a drenta opheshonnan ku ta duna e impreshon manera ku nan lo pèrdè kliente dor di e Korte aki. I tambe ku lo bin un oumento deskomunal den kasonan na Korte dor di tur e kasonan di konsumidó ku lo bini dilanti. E tardansa ta lógiko mirando ku ora tin diferensia di opinion ta preferá di hasi nada.
Si nos analisá kehonan ku Fundashon pa Konsumidó ta risibí nos por dedusí ku den mayoria kaso e balor di e produkto òf servisio ku tin disputa tokante di dje ta ménos ku 2 mil florin. Un sapatu di 300 florin, un wasmashin, televishon, tarifanan di awa i telefòn. Tur ta kasonan kaminda ku na momentu ku un intermediashon di Fundashon frakasá, pasobra e komersiante no ta koperá, e konsumidó no ta paga un abogado mil florin pa bai Korte. E gastunan pa yega na bo derechi ta muchu mas ku e derechi ku bo ta buska.
Den e lunanan benidero nos ta bai averiguá na unda e lei di Korte di Konsumidó ta pegá, pa nos poné bèk riba e kaminda bon pa e tambe keda akordá.
Korte pa konsumidó
Editorial
PRÓLOGO
Marc Marshall
Direktor Fundashon pa Konsumidó