Nos kurpa mes no por produsí vitamina C, sinembargo e tin mester di dje. Nos kurpa mester di vitamina C na un kantidat limitá. Na momentu ku nos usa demasiado vitamina C, lo e sali for di nos kurpa via di urina komo ku e ta disolvé den awa.
Vitamina C ta un di e nutrientenan di mas importante den nos dieta regular, e ta hopi benefisioso pa nos salú. Nos kurpa tin mester di dje pa por funshoná bon. Vitamina C ta yuda kombatí grip, pa motibu ku e ta mehorá e sistema di defensa di e kurpa. E ta prevení inflamashon i ta duna e kurpa kímikonan ku ta yud’é prosesá kuminda. Vitamina C ta kontené antioksidante ku ta yuda pa kombatí e radikalnan liber den e kurpa i asina evitá inflamashon, infekshon i vírùs ku ta ataká e kurpa. Ademas vitamina C ta yuda konstruí proteina den vários tipo di sèl i ta protehá nos kontra di ataka di kurason i selebral. Otro efekto positivo di vitamina C ta ku e ta mantené karni di djente i djentenan salú. Vitamina C ta sòru pa heridanan por kura mas lihé. Personanan ku ta sufri di kolèsteròl, katarata, diabétis, alergia i asma lo benefisiá grandemente di e uso di vitamina C, pasobra komo anti-oksidante e ta protehá e adernan i e lèns di wowo.
Señalnan ku ta mustra falta di vitamina C.
Djente moli i karni djente ku ta sangra, heridá ku no ta sera lihé, kabei ku kai, doló di djòint, depreshon i falta di energia.
Unda ta haña vitamina C?
Ta haña Vitamina C den mayoria fruta i berdura fresku. Sinembargo frutanan sítriko manera apelsina, lamunchi hel i bèrdè, kiwi i shimaruku, ta esnan ku ta kontené mas vitamina C. Tambe den promentòn bèrdè, stròbèri, tomati, broccoli, batata dushi i berdura di blachi bèrdè bo ta haña un kantidat rasonabel di vitamina C. Tur fruta i/òf berdura ku ta kontené vitamina C mester wòrdu komé mas serka di su kosecha òf wòrdu wardá den un baki ku tapa pa evitá ku e ta pèrdè su efektividat.
Kortesia di Sanatura Curaçao
Vivian Allee
Cel: 671-3175
dikon e ta asina importante?
VITAMINA C