Telefon Òf tÈblet
KOMPARÁ I KUMPRA
Mangusa Hypermarket:
Esun ku mas produkto na mihó preis i mihó surtí!
Fundashon pa Konsumidó den estrecho koperashon ku Inspekshon Ekonómiko di Ministerio Ekonómiko a hasi anotashon di preis di produktonan ku konsumidónan ta usa mas durante di e temporada di kuaresma. E anotashon di preis aki a tuma lugá durante di e periodo di 7 te ku 11 di mart 2016. E lista di produkto di kuaresma ta konsistí gran parti di produktonan di laman ku no ta kai bou di preis máksimo stipulá dor di gobièrnu. Fundashon pa Konsumidó a analisá e preisnan anotá i ta publiká e resultado den un komparashon di preis.
Pa e anotashon di preis aki Inspekshon Ekonómiko a bishitá 16 establesimentu. E supermerkadonan ku a bishitá ta: 2000, Albert Heijn, Arco Iris, Arti’s, Best Buy, Bon Bini, Boulevard Market Place, Centrum Mahaai, Centrum Piscadera, Colon, Esperamos, Exito, Manguso Rio, Mangusa Hypermarket, Ruyterkade i Vreugdenhil. E lista di produkto ku a hasi uso di dje tabata konsistí di 152 produkto. E produktonan ta repartí den diferente kategoria, entre otro: tuna den bleki, salmou den bleki, makrel den bleki, saldinchi den bleki, uster den bleki, piská, bòkel, bakiou ku wesu, bakiou sin wesu, paki di krap, seafood mix, berdura, bonchi di paki, bonchi den bleki, pitipuá den bleki, pitipuá di bòter, roibit i webu di Pasku.
Basá riba e resultado di e komparashon di preis ku Fundashon pa Konsumidó a hasi, Mangusa Hypermarket a resultá e supermerkado mihó surtí, ku 116 produkto di e 152 produktonan ku a anotá nan preis. Mangusa Hypermarket a resultá tambe e supermerkado ku mas produkto na mihó preis ku 35 produkto. Na di dos lugá a resultá Mangusa Rio ku 30 produkto na mihó preis. Na di tres lugá a sali Bon Bini i Centrum Mahaai ku 21 produkto. Ruyterkade a resultá e supermerkado ku mas produkto na preis mas haltu.
For di e resultado di e komparashon di preis aki, Fundashon pa Konsumidó a konstatá diferensia di preis ku ta varia di fl. 0.01 i fl. 28.48. Pa loke ta trata e kategoria di piská por a nota diferensianan di preis ku ta varia di fl. 3,50 i fl. 28.48. Por ehèmpel, un kilo di karkó ta kosta fl. 36,52 na Centrum Mahaai i na Ruyterkade Supermarket fl. 65,00, lokual ta fl. 28.48 mas karu. Pa un kilo di filèt di salmou, un konsumidó ta paga fl. 26,95 na Mangusa Rio i Mangusa Hypermarket, miéntras ku na Centrum Piscadera e preis ta fl. 47.95, un diferensia di fl. 21,00.