Samsung Galaxy S6 ta pará haltu den e òrdu di prueba di telefòn portátil di Consumentenbond Hulanda. Ku e Samsung Galaxy S7 (Edge), Samsung ta sigui lucha pa un posishon haltu. Di pafó e modelo di telefòn Galaxy S7 ta mustra paresido na e Galaxy S6, pero e ta akabá un poko mas kontemporáneo. Asina e glas na e bandanan ta bog suavemente. Mas importante ta e espasio pa hinka un karchi ‘SD’ den e telefòn, ku por kontribuí pa amplia e kapasidat di memoria pa warda informashon te 200 GB.
‘Edge-variant’ grandi ku chèns pa uza ku 1 man
Galaxy S7 ta un telefòn inteligente ku un pantaya di 5.1inch (13cm). E S7 Edge ta un variante poko mas grandi di 5.5 inch ku rant di pantaya ku ta kurva na tur banda. Paso un telefòn inteligente di 5.5 inch ta poko fèrfelu pa tene ku 1 man, ta bon ku tin un funshon di akseso dirèkt (Edge UX) disponibel, for di unda por haña akseso na e aplikashonnan mas uzá. Tòg ta parse ku e kalidat pa lesa informashon no ta dje bon ei, meskos pa ta konta pa e lus ku ta reflehá den e pantaya.
Pantaya semper sendé, no ta sendé semper
Meskos ku LG G5, Samsung su telefòn inteligente nobo tin un pantaya ku semper ta sendé. E ta mustra e fecha i ora, pero tin otro opshonnan tambe manera agènda i yamadanan pèrdí. Pantaya semper sendé ta un personalisashon i diseño di otro desaroyadó. Te kon leu esaki lo afektá e durashon di bateria, lo sali na kla mas despues for di resultadonan di tèstnan. Samsung ta papia di un sistema pa spar energia i evitá vrismentu di pantaya, ora esaki ta kabes abou òf den saku di karson.
Protekshon kontra un aksidente ku awa
E telefòn selular Galaxy S7 (Edge) ta di sil paden, ya asina esaki por keda te ku 30 minüt den un awa ku un profundidat di 1.5meter. Sinembargo tantu e kompania Sony i Samsung ta indiká ku e karakterístika aki no ta motibu pa ningun hende bai hinka telefòn intenshonalmente den awa. Ta trata aki di un tèst den sirkunstansianan spesífiko, pues no mester baña òf landa ku e telefòn. E karakterístika adishonal aki simplemente ta yuda ku e telefòn por sobrebibí na momentu ku resultá ku el a kai den awa.
Kámara prometedor
E mihó kámara ta esun ku bo tin semper huntu ku bo, i sakamentu di potrèt ku telefòn inteligente ta hopi popular. Ta bon ku e kámara di e Galaxy S7 (Edge) ta sali un tiki ménos for di e aparato. E punto fuerte di e kámara ta su kalidat. Pa a mehorá e kámara mas aleu e aña aki, e diafragma ta f1.7, loke ta pone ku e por fangu mas lus ku su sènsor. Tambe tin ‘pixels’ físiko mas grandi, ku ta wòrdu usá pa hasi e imágen kapturá mas skèrpi pa medio di focus outomátiko.
Lihé, fresku i renobashon pa bo weganan
Prinsipalmente esun ku ta hunga spèl ta benefisiá mas di e rapides di Galaxy S7 (Edge). Pa evitá ku na momentu ku ta hunga spèl riba e telefòn e bateria ta baha lihé i e aparato ta keinta, tin un téknika nobo pa fria e aparato i tambe un téknika pa mira gráfiko a wòrdu apliká. Interesante pa menshoná ta e “Game Launcher-app” i e “Game Tools-menu”. Ku e promé aplikashon tur spèl ta agrupá na 1 solo lugá. Ku e “Game Tools-menu” por haña akseso lihé na funshonnan importante manera ‘no stroba’ minimalisá, deskonektá teklanan físiko i e trahamentu di shòt di pantaya (screenshots i video).
Realidat Virtual i potrèt i video di 360 grado
Segun Samsung, Realidat Virtual ta e siguiente desaroyo grandi di merkado aworakí. Ku un kámara ku un Gear di 360 grado ta spera di por saka potrèt i traha filmashon apart. E imágennan aki bo por mira nan ku un brel spesial. Un brel spesial di Realidat Virtual ta wòrdu ofresé na momentu ku bestèl un Galaxy S7 (Edge). Despues e brel aki lo ta optenibel apart tambe, meskos ku otro asesorionan manera bateria, kargadó di telefòn i protektor di telefòn. Un vershon anterior di Gear di Realidat Virtual tabata impreshonante.
Aktualisashon
Na momentu ku a divulgá e produkto no a papia tokante di e periodo di aktualisashon di e telefòn. Riba e página elektróniko di Samsung tampoko no por a haña informashon tokante aki. Consumentenbond Hulanda ta vigilá e situashon i lo pone akshon, pasobra a konstatá ku hopi produkto Android no tin un sistema adekuá di aktualisashon i nan ta di opinion ku e fábrikanan por duna mihó informashon tokante esaki.
Preis i disponibilidat
Fotógrafonan, hungadónan di spèl i amantenan di telefòn inteligente di un nivel tòp lo haña Galaxy S7 òf Galaxy S7 Edge, un telefòn inteligente aktualisá ku tur kos na dje.
Fuente: Consumentenbond