Pregunta: Standing order
"Ata, e luna aki ma kobra lat i banko su “standing order” no a bai, Fundashon kiko mi por hasi, paso awor si e sèn a drenta?"
Kontesta:
Standing order ta un formulario di apoderashon di banko (machtigingsformulier) kaminda bo ta duna banko outorisashon pa kita outomátikamente un montante di sèn fo’i bo kuentanan durante un temporada fiho, riba un dia fiho pa manda na un otro kuenta. Naturalmente dor ku esaki ta wòrdu hasí outomátikamente riba e dia stipulá, abo komo kliente/konsumidó mester sòru pa e kuenta tin sufisiente fondo pa e montante por wòrdu kitá for di e kuenta riba e dia stipulá.
Asina ta ku tin biaha dor di rasonnan fuera di nos alkanse no por kita e montante riba e dia stipulá. algun ehèmpel ta, insufisiente sèn riba e kuenta bankario òf bo salario a drenta lat òf bo kuenta . Esei ta pone ku bo no a paga riba e dia ei i no a kumpli ku bo “standing order”. Pero semper abo komo konsumidó ta responsabel pa tin sufisiente fondo riba bo kuenta.
Si resultá ku no por kita e sèn for di riba bo kuenta riba e dia stipulá, tene na kuenta ku un “standing order” ta algu outomátiko i banko su sistema outomátiko no ta bai keda purba tur dia pa wak si porfin sèn a subi e kuenta, pa asina kita sèn tòg for di bo kuenta.
Lokual abo por hasi ta, ora bo sa ku riba bo kuenta tin sufisiente fondo pa por kumpli ku e montante di sèn, bo por aserká banko i pidi banko pa kita e sèn tòg for di e kuenta, ounke e fecha a pasa kaba. Tene kuenta sí ku ora e fecha stipulá pasa, por bini èkstra gastunan aserka manera interes i tambe e gastu pa kita e montante fo’i kuenta.
Tambe no mester lubidá ku esaki ta algu ‘eenmalig’ pasó e propósito di un “standing order” ta pa kumpli ku pago na tempu. Si abo komo konsumidó no ta hasiendo esaki, bo ta haña retraso den pago i konsekuentemente por yega na tin ku paga gastunan adishonal i wòrdu registrá komo un konsumidó ku semper ta paga lat. Pa evitá problema Fundashon pa Konsumidó ta konsehá pa tene kuenta ku e fecha di kada “standing order” ku tin na banko i trata di pèrkurá pa laga sufisiente sèn riba e kuenta pa esaki por wòrdu ehekutá debidamente.
MANDA BO PREGUNTA,
NOS LO KONTESTÁ!