Salmou
ku rosamarein
Grandinan sa bisa, kada loko ku nan teima. Refiriendo na e echo ku kada ken tin nan propio gustu i preferensianan. E okashon aki nos ta kompartí un dushi reseta di salmou ku nos konsumidónan. Esaki spesialmente pa esnan ku ta kome piská poko mas tantu den e temporada di kuaresma aki.
Ingrediente:
2 tenchi konofló machiká
1 pida rosamarein fresku òf seku
¼ kùp di zeta di oleifi
3 filèt òf mochi di salmou
2 lamunchi
Un tiki salu di laman
Preparashon
Kita tur skama for di e salmou. Laba e salmou i pone para den un tiki awa ku salu i lamunchi pa dies minüt. Basha e awa afó i bolbe pone un tiki awa mas riba dje. Laga e awa skore for di e salmou.
Pone e salmou den un skalchi di glas (pyrex). Basha e zeta di oleifi riba e salmou, plama e konofló machiká riba nan i stroi e rosamarein. Si ta deseá por stroi un tiki salu mas riba e salmou.
Hinka e skalchi di glas den un fòrnu keinta na 350 grado pa entre 10 pa 15 minüt.
Por kome e salmou aki ku aros òf aros brùin.
Algun benefisioso di salmou
- Ta kontené Omega 3
- Ta un bon fuente pa vitamina B6 i B12
- Ta kontené vitamina D