Di unda e palabranan artrítis i artrósis ta bini? “Artros” ta nifiká skarnir i “itis” ta nifiká inflamashon miéntras ku “osis” ta nifiká e proseso di degenerashon. Artrítis i artrósis tur dos ta kehonan di sirkulashon, kaminda un di nan ta inflamashon i e otro ta konosí den boka di pueblo komo “gastamentu di wesu” òf slèitazje.
POR RIPARÁ E MALESA KU MIKROSKOP
For di e edat di 20 pa 30 aña por kuminsá ripará esaki ku un mikroskop. Kaminda ku wesu ku wesu ta topa ku otro, e wesunan aki ta keda kubrí ku un parti fini di wesu moli (kraakbeen). Wesu moli ta un tehido moli den forma di elastik ku ta protehá e wesu i ta sòru pa e wesunan por pasa fásilmente kantu di otro, pa medio di e skarnir.
Na momentu ku e proseso di slèitazje kuminsá, e elastisidat di e wesu moli ta bira ménos. E parti ariba di e wesu moli ta kuminsá haña sker den dje, i e wesu moli di e dos wesunan ta kambia i nan no ta igual na otro mas. Dor di e efekto ku e dos wesunan ku no tin protekshon i ta keda lastra na otro, ta surgi sleitazje.
Na momentu ku yega asina leu ku e wesu/skarnir ta sin e kapa di e wesu moli ta surgi e asina yamá osteophyten. Ku otro palabra: e wesu ta krese i ta kria punta na rant di e skarnir. Ora e parti ariba di e skarnir kuminsá gasta, e ta manda pida pida fragmentonan di wesu moli den e skarnir. E pida pida wesunan moli aki ta kousa un reakshon di inflamashon.
INFLAMASHON
Konsekuensia di e inflashon aki ta hinchamentu i e moveshonnan den e skarnirnan ta bira ménos. Esaki ta trese kuné un pida wesu ku ta keda lòs den e skarnir. E pida wesu aki por laga e skarnir lòk. Esaki ta trese kuné ku e pashènt e ora ei no por move e skarnir. Ta te na ora ku kita e pida wesu, e ora ei e moveshon por kontinuá di forma normal.
No ta semper artrósis ta kousa doló òf inkumbiniensia. Tin personanan ku tin keho, sin ku un foto di “röntgen” por indiká ku tin algu robes na e skarnir. I meskos tin biaha por haña ku riba foto di “rontgen” por mira bon kla e problemanan na e skarnir, pero tòg e persona no tin keho.
DOLÓ DEN SKARNIR
E keho mas importante serka Artrósis ta doló den e skarnir. Hopi biaha por tende e keho ku e persona ta sinti doló na momentu ku e kuminsá hasi moveshon i miéntras ta sigui, e doló ta disparsé. Si e kehonan ta persistí i ta dura largu, esaki ta indikashon ku no solamente e doló tei na momentu di move, pero asta ora ta sosegá esaki. Konsekuensia di esaki por ta ku segun añanan ta pasa, e hende ta move ménos loke por trese kuné ku e múskulonan ta bira slap. Na su turno tambe ta bini keho di doló den e múskulonan i e dolónan den e skarnirnan ta bira ainda mas fuerte, ya ku e múskulonan slap ta duna ménos protekshon.
NUTRISHON KOREKTO
Den medisina natural e filosofia ta ku tur malesa tin relashon ku e nutrishon di un persona. Esaki tambe den kaso di problemanan den skarnir di kurpa. Serka sierto hende alergia pa sierto kuminda ta hunga un ròl grandi. Bo por ta kome un kos ku bo kurpa no por kontra di dje i esei por kousa ku bo ta haña doló den kualkier parti di kurpa. Tin biaha ta difísil pa pone dede eksaktamente riba e produkto òf alimento ku ta kousa e problema. Hopi biaha ta produktonan manera lechi i e produktonan ku ta wòrdu trahá ku lechi (manera keshi) webu i grano tambe. Den kaso di artrósis, artrítis i reumatismo ta konsehabel pa stòp kompletamente ku produktonan manera kòfi, chukulati, limonada, pan blanku, karni (espesialmente karni di porko) i sierto spesereinan.
Ora bo a laga e produktonan aki para, bo tin ku hasi un dieta speshal, ku ta yama un dieta di eliminashon. Esaki ta un dieta ku bo ta stòp ku tur kos ku por kousa problema di salú. Despues pokopoko i unu pa unu bo ta agregá un produkto mas den e dieta. Di e manera ei bo ta haña sa kua produkto ta kousa e problema òf malesa, pasobra manera bo usa e produkto ku ta kousá problema, bo kurpa ta manifestá òf rechasá esaki.
.
BO SALÚ
ARTRÓSIS I ARTRÍTIS