Telefon Òf tÈblet
KOMPARÁ I KUMPRA
Den kuadro di nos tarea pa informá konsumidónan tokante di preis, Fundashon pa Konsumidó a hasi anotashon di preis di produktonan di karni den 21 diferente establesimentu na Kòrsou. E anotashon di preis aki a tuma lugá di 13 pa 23 di febrüari 2016. E establesimentunan ku a partisipá na e anotashon di preis aki ta 2000, Arco Iris, Arti’s, Best Buy, Bon Bini, Boulevard Market Place, Centrum Mahaai, Centrum Piscadera, Colon, Esperamos, Exito, Mangusa Rio, Mangusa Hypermarket, Ruyterkade, Vreugdenhil, LZF, Fei Cui, Bonam, Queens, Luna Park i Sta. Maria. Fundashon pa Konsumidó a kompilá tur e preisnan den un lista di komparashon di preis pa por fasilitá konsumidónan. Den e komparashon di preis aki Fundashon pa Konsumidó no a tene kuenta ku pais di orígen, marka ni kalidat di produkto.
Centrum, esun ku mas tantu produkto na mihó preis
Centrum Mahaai i Centrum Piscadera a resultá e dos supermerkadonan ku mas produkto di karni na mihó preis. Na e dos supermerkadonan aki tabatin 11 produkto na mihó preis, for di e lista di 35 produktonan ku Fundashon pa Konsumidó a usa pa e komparashon di preis. Na e dos filialnan di Centrum, por haña karni stoba, karni kabritu (eis), karni sòpi, mondongo, loin ribs, ala di galiña, skouder ham, ham di kalakuna i wòrs salu. Mangusa Rio i Mangusa Hypermarket a resultá na di dos lugá pa loke ta trata produkto na mihó preis ku 8 produkto, esakinan ta, higra di baka, pòrchòp, galiña mulá, galiña hinté, chicken breast, drumsticks, thighs sin wesu i jonge kaas.
Mangusa Rio i Hypermarket, esnan mihó surti
Mangusa Rio i Hypermarket tabatin tur 35 produkto for di e makutu di produktonan di karni ku Fundashon pa Konsumidó a anotá. Centrum Mahaai i Piscadera tabatin 33 produkto for di e lista di 35 produkto di karni. Na di 3 lugá a sali Arco Iris ku 31 produkto.
Fundashon pa Konsumidó ta konsehá tur konsumidó pa traha nan lista i kumpra produktonan di karni kaminda ta kumbiní. Tambe nos ta konsehá pa kòrda kontrolá e produktonan di karni bon promé ku kumpra. Por ehèmpel, holó ta un bon indikadó si e karni ta fresku òf nò. Tambe bo por mira si e karni ta fresku na su koló. Karni fresku ta ros òf kòrá. Tin algun establesimentu ta hasi uso di sierto tipo di lus, pa laga e karni mustra mas kòrá ku e ta, p’esei ta bon pa purba kontrolá e karni for di den e lus artifisial.
Pa e tabèl:
Pa mas informashon tokante di komparashon di preis di produktonan di karni por tuma kontakto ku Fundashon pa Konsumidó na:
- telefòn: 462-6666
- e-mail: [email protected]
- wèpsait: www.fundashonpakonsumido.org
- Facebook: Fundashon pa Konsumidó
PRIMI AKI