Ken no a yega di haña unu i lubidá kompletu di us’é? Na diferente okashon manera hasimentu di aña, selebrashon di kasamentu, nasementu di un yu, boutismo, risibimentu òf konfirmashon, nos konsumidónan ta regalá òf ta risibí un bòn di regalo.
Kiko ta un bòn di regalo?
Un bon di regalo ta un bòn di balor (mihó konosí komo “waardebon”), den forma di un papel di prent ku ta representá un montante di sèn, kual ta wòrdu duná na un persona. E persona por hasi uso di dje pa kumpra algu segun su propio deseo. E montante menshoná riba e bòn ta representá e mesun funshon ku ora bo uza sèn di papel òf moneda pa paga òf kumpra algu den un establesimentu. Asina ta ku bo por entregá bo bòn di regalo na un establesimentu pa bo por haña a kambio un produkto òf servisio.
Aparte ku un bòn di regalo ta un tipo di bòn di balor, tin diferente otro tipo di bòn ku tambe ta bòn di balor ku ta wòrdu duná komo regalo manera: un buki di bòn, un chèk di biahe i un bale (tegoedbon).
Pa kiko ta regalá bòn di regalo?
Hopi persona ku ta gusta duna regalo, ta bisa ku un bòn di regalo ta shik i tin un efekto bunita (“Conotatie”) serka esun ku ta hañ’é. Tambe e bòn di regalo ta mas fásil pa duna, pasobra asina bo por regalá algu sin mester preokupá pa buska algu ku ta kuadra ku e persona. Aparte di esaki, e persona ku risibí e bòn di regalo pa bai kumpra un produkto òf servisio ta haña e idea ku lokual e ta kumpra ta algu ku e mes a elegí na su mes smak, uso i hasta su mes sais.
Desbentahanan di un bòn di regalo
Hopi bia ora un persona haña un bòn di regalo, nan ta pensa ku esei ta bálido pa semper. Esaki lástimamente no ta bèrdat i ta dependé di lokual ku ta wòrdu skibí riba e bòn di regalo. Si un bòn di regalo no tin ningun fecha, esei por ta indiká ku e bòn di regalo ta bálido pa semper. Tin biahe tin bòn di regalo ku tin solamente e dia ku a kumpr’é riba dje, esaki ta enserá ku pa lei bo tin 5 aña pa por hasi uso di dje (Artíkulo 3:307 insiso 1 di nos Kódigo Sivil). Un bòn di regalo tin mag di tin un balides di ménos ku 5 aña, pero esei mester wòrdu anunsiá riba e bòn. Bon mirá, un bòn di regalo no tin mag di tin un balides di ménos ku 1 aña, pasó e por wòrdu mira komo irashonal (onredelijk) pa e konsumidó. (Artíkulo 6:236g di nos Kódigo Sivil). Ku eksepshon ku un komersiante por prueba ku den su sektor ta rashonal (redelijk) pa uza un término di ménos ku un aña. Un ehèmpel ta ku bo a bai un konsierto di festival di Tumba i bo a kumpra bòn di konsumo pa bo uza durante di e festival.
Un otro desbentaha ta ku no por kambia un bòn di regalo pa sèn kèsh. Esei ta nifiká ku si bo kumpra un produkto òf servisio na balor di 49 florin i bo bòn di regalo ta bal 50 florin, e komersiante no ta obligá na duna bo e 1 florin ku a sobra. Pero un bon komersiante lo trata na bende bo algu otro aserka i ofresé bo pa paga e diferensia.
Bentahanan bòn di regalo
Den nos mundu moderno kaminda sèn giral ta hunga un ròl, nos a haña hasta diferente karchi plástiko yamá “giftcard/prepaidcard” ku por wòrdu duná komo regalo. E karchinan aki ta fásil pa hinka den pòtmòni pa kana kuné i asina por wòrdu uza mas lihé sin tin ku lubidá riba dje. Un otro bentaha ta ku no ta nesesario pa gasta tur e montante mesora na e mesun establesimentu. Si sobra sèn riba e karchi, e persona por warda e karchi i uza esaki un otro dia basta e tempu bálido no a pasa.
Tep
• Si bo haña un bòn di regalo no ward’é muchu
leu, pa bo no lubidá riba dje.
• Si bo regalá un persona un bòn di regalo, trata
na puntra e persona despues di un par di dia
òf siman si el a logra hasi uso di e bòn di regalo.
• Por último por resultá enbèrdat ku e fecha a
pasa i ku un komersiante no ta obligá pa tuma
un bòn di regalo ku a kaduká. Semper ta bon pa
djis aserká i puntra e komersiante tòg si por hasi
un eksepshon.
BÒN DI REGALO
POR KADUKÁ?