"E aparato elektróniko ta kòrta mi i heridá mi.”
Dia 15 di desèmber 2015 Konsumidó X a aserká FpK ku un preokupashon grandi. Konsumidó a kumpra den ougùstùs 2015 un “Shaver Panasonic” na balor di 220 florin i den apénas algun luna e “shaver” ta haña buraku den e blet i saka herida na kara i kabes di e konsumidó. Ku intermediashon di parti FpK a aserká e komersiante pa e keho aki, pero komersiante a duna di konosé ku no por hasi mashá pa e konsumidó, ya komo e konsumidó mes tin falta den esaki, dor ku e konsumidó no a uza e aparato adekuadamente.
Punto di atenshon
Pa medio di e kaso aki FpK ke hasi un rekordatorio na tur konsumidó, “kòrda ku bo derechi ta mará na kada kaso spesífiko i tambe bo deber komo konsumidó na uza un aparato pa lokual e ta destiná pe”. Komo konsumidó, bo tin derechi di reklamá ora un produkto resultá di ta inefisiente, pero komo konsumidó bo ta responsabel pa uzá e produkto adekuadamente tambe. No por ta asina ku un komersiante mester para responsabel pa bo mal uzo di un aparato.
Solushon:
Den e kaso aki, e komersiante por a ninga na yuda e konsumidó, pasobra e konsumidó a hasi mal uso di e aparato dor di uz’e pa feita su kabes na lugá di su kara. Pero e komersiante a hasi un akto di “buena fe” i a tuma e produkto bèk i a laga konsumidó kumpra algu na balor di e produkto.
Den e rúbrika Derechi i Deber nos ta nombra e 8 derechinan básiko ku un konsumidó tin i tambe nos ta indiká ku un konsumidó por aserká Fundashon pa Konsumidó (FpK) ku kualke pregunta òf keho. Den kuadro di kehonan ku Fundashon pa Konsumidó ta risibí, nos lo ilustrá 2 kaso ku a wòrdu solushoná dor di intermediashon Fundashon pa Konsumidó.
“Mi paña a sker.”
Konsumidó a kumpra wayabera na balor di 65 florin pa bisti Pasku. Pasku den dia, sintá na un fiesta konsumidó ta sinti ku e wayabera a sker habri fo’i otro. Despues di dianan di Pasku Konsumidó a aserká komersiante pa por splika i reklamá e sker. Komersiante no ke tende i esei ta buta ku konsumidó ta aserká FpK, pa por yud’é haña su derechi.
FpK a aserká komersiante i splik’é ku ounke un sker por mustra ku ta e konsumidó mes a kibra e wayabera, den e kaso aki ta distinto, pasobra si e komersiante mes kue e wayabera i wak e bon, e por ripará ku e so ta habri fo’i otro. Ademas e wayabera no ta pèrta, ni e konsumidó no a hasi nada pa krea e sker. Esaki ta nifiká ku nèt e wayabera aki a bini ku un fout di fábrika i ku e konsumidó no (por) ta responsabel.
Solushon
Komersiante a tuma 2 dia pa kontaktá
su provedor di paña i a yama FpK pa
bisa e konsumidó pa pasa tuma un otro
wayabera mesun kos, pero na otro koló
òf si konsumidó no ke, e por haña su
èn bèk.
Punto di atenshon
Basá riba lei, si resultá ku un produkto
ta inefisiente den un tempu no esperá,
un komersiante mester haña tempu pa
drech’é. Si e no por drech’é, e mester
remplasá esaki. Ta ora e no por drecha ni
kambi’é, e mester duna e konsumidó
sèn bèk.
Den e kaso aki e konsumidó a disidí
di tuma su sèn bèk pa e wayabera ku a sker.
IMPOSIBEL
KASONAN RESOLVÉ
pa La Curaçao Zeelandia