Un estudio realisá pa dòkternan di UHealth-University of Miami Health System a revelá ku kasi 20 porshento di personanan entre 10 i 20 aña di edat, ta sufri di pèrdida ouditivo pa motibu di muzik duru. E Organisashon Mundial di Salú a indiká ku kasi 50% di abitantenan entre 12 pa 35 aña ta eksponé na volúmennan ku no ta rekomendabel, debí na uso di aparatonan elektróniko personal.
“Skuchamentu di músika ku volúmen haltu, kombiná ku zonido eksageradamente haltu durante konsiertonan ta un preokupashon pa esnan den salú públiko”. “Awendia tin mas tantu hóben ku problema di oido kompará ku ántes”. Segun Dr. Sandeep Dave, di Nicklaus Children’s Hospital, e “problema” aki ta debí prinsipalmente na e echo ku aparatonan (gadgetnan) moderno ku nos hóbennan tur ta loko kuné, ta duna nan chèns pa warda i skucha muchu mas tantu kansion ku tabata e kaso den pasado. E radio kasèt rikòrdernan di ántes, manera entre otro e Walkman Sony tabata duna bo chèns pa skucha un kantidat limitá di músika, konsekuentemente bo tin e “aparato” ei pa ménos tempu na bo orea.
Awendia nos hóbennan ta pasa muchu mas tantu ora skuchando músika i esaki kombiná ku e echo ku e aparatonan pa skucha muzik a bira mas sofistiká, por produsí mas daño na nan oido. Ademas dòkternan a konstatá ku e hóbennan di awendia no ta protehé nan mes bon kontra e desibèlnan haltu aki.
Kiko ta desibèl?
Intensidat di zonido ta wòrdu midí den unidatnan ku nos ta yama desibèl. Kualke zonido di mas ku 80 desibèl ta ser konsiderá komo peligroso si un hende ser eksponé pa tempu largu na esaki. E kousa prinsipal di problema ta ku e “earphonenan” di awendia, no ta blòkia e zonidonan eksterno, manera un headphone di kabes si lo a hasi. Konsekuensia di esaki ta ku e hóben ta inkliná na hisa e volúmen dje aparato pa e por skucha su músika mas mihó, i hopi biaha ta hasi esaki na nivelnan ku ya ta peligrá e oido humano. Si un persona banda di bo por skucha bo muzik, e ora ei e volúmen ta demasiado haltu.
Tipo di leshon
Tin 2 tipo di leshon ku un hende por hasi
na su oido. Un di e leshonnan ta
enserá pèrdida temporal di oido, i e di
dos ta ora un persona pèrdè su oido
permanente. Pèrdida di oido
temporal por ser remediá, òf por
bira normal bèk denter di
24 ora. Pero si konstantemente un
persona ta pèrdè e habilidat pa
tende maske ta pa un periodo kòrtiku,
ta ora pa buska tratamentu pa e
problema aki. Ser eksponé pa largu
tempu na muzik duru i sigur si ta pará
hopi serka dje fuente di músika, ta
faktornan importante pa pèrdida di oido.
E muzik tin di dal pa bo sinti'é?
PROTEHÁ
... bo oido kontra di muzik muchu duru!