DERECHI I DEBER
REKORDATORIO
Den nos rúbrika di derechi i deber, nos ke habri aña 2016 poniendo énfasis i rekordando e derechinan básiko di un konsumidó. Un konsumidó konsiente no solamente mester sa su derechinan, pero tambe e mester sa kompará, reklamá, investigá i ninga di kumpra ora e ta wòrdu perhudiká. Abo, komo konsumidó mester realisá ku bo tin poder. Abo tin bo finansa i plaka den bo man i ku esaki bo por kumpra produkto òf servisio manera bo ta deseá. Pues ningun hende no por obligá bo hasi ningun kompra.
Hasta den un merkado di tiki suministro, konsumidónan uní por fòrsa un komersiante na kambio, si nan sa nan derechinan, ta ehersé nan i no ta kumpra si nan ta wòrdu perhudiká. Den añanan 80 Nashonnan Uní a adoptá 8 derechi di konsumidó basá riba un manifesto di Consumers International.
Derechi riba satisfakshon di nesesidatnan básiko
Kada konsumidó mester por tin akseso i disposishon di bibienda, awa, paña i kuminda.
Derechi riba seguridat
Konsumidónan mester haña protekshon kontra produktonan, prosesonan di produkto i servisio ku por ta maligno pa nan bida i salú.
Derechi riba informashon korekto
Konsumidónan mester haña informashon di un produkto òf servisio dor di lesa etikèt òf dor di puntra e komersiante. E komersiante na su turno mester duna informashon korekto, i no mester gaña e konsumidó dor di duna informashon ku no ta kuadra òf hasi propaganda falsu.
Derechi pa eskoho liber
Promé ku un konsumidó kumpra un
produkto òf servisio, e konsumidó mester
ta liber pa por hasi eskoho entre diferente
produkto i servisio na preis kompetitivo.
Derechi ser keda skuchá
Un konsumidó tin derechi pa ekspresá na interes di konsumidónan i di ser skuchá na momentu ku ta traha i ehekutá maneho i leinan. Fundashon pa Konsumidó ta hunga un ròl di sumo importansia den representashon di konsumidónan.
Derechi pa reklamá
Ora abo komo konsumidó hasi kompra di un servisio òf produkto, si akaso resultá ku esaki no tin e kalidat ku bo a premirá, bo mester por indiká i reklamá esaki.
Derechi riba edukashon komo konsumidó
Konsumidónan tin e derechi pa haña konosementu i akseso na informashon nesesario pa por ta konsumidónan konsiente i bon informá. Tambe nan mester ta na haltura di derechi i responsabilidatnan di konsumidó i kon pa hasi uso i kumpli ku esakinan.
Derechi riba un medioambiente sano i duradero
Konsumidónan mester por traha i biba den un medioambiente ku no ta forma menasa pa presente ni futuro generashon.
8 Derechinan básiko di Konsumidó