ENTREGA di
SERTIFIKADO
NOTISIA
Ku hopi satisfakshon i orguyo Fundashon pa Konsumidó a introdusí un siklo di 5 programa di televishon informativo. Meta di e siklo di programa ta pa informá, konsientisá i eduká konsumidónan riba tópikonan ku ta di importansia pa tur konsumidó. E programa a hiba e título Konsumidó Konsiente. Durante di e programanan a trata diferente tópiko, manera presupuesto, garantia, makutu básiko, Lei di Outoridat di kompetensia i regulashonnan nobo di Banko Sentral pa dunamentu di fiansa. Pa medio di skèchnan edukativo, entrevista ku un invitado spesial i diferente tep a presentá e tópikonan na konsumidónan. Den e edishon di Konsumidó Alertá aki nos ta kompartí e tres promé edishonnan. Pa e 2 otro edishonnan chèk nos wépsait i nos kanal di Youtube.
Edishon 1: Presupuesto
Un Konsumidó Konsiente tin e responsabilidat pa manehá su finansa di un forma responsabel. Den e promé edishon di Konsumidó Konsiente, ta pone atenshon na e materia di presupuesto. Kiko ta un presupuesto, kon ta traha un presupuesto i kiko ta benefishinan di un presupuesto pa un famia.
Edishon 2: Garantia
Komersiantenan tin e deber di duna konsumidónan garantia ku e produkto òf servisio ku nan ta kumpra ta konforme e akuerdo di kompra. Den e di dos edishon di Konsumidó Konsiente, e tópiko di garantia ta sentral. E programa ta duna splikashon kiko ta garantia i tambe tepnan balioso di kiko konsumidónan mester tene kuenta kuné tokante di garantia.
Edishon 3: Makutu Básiko
Gobièrnu di Kòrsou a krea un makutu básiko, den kua nan a skohe produktonan di promé nesesidatnan pa konsumidónan. Preis di e produktonan den e makutu básiko ta wòrdu regulá di tal forma ku henter komunidat por kumpra. Edishon 3 di Konsumidó Konsiente ta splika meta di makutu básiko i e benefishinan di esaki pa Konsumidónan.
Un siklo di programa informativo pa konsumidónan
Konsumidó Konsiente