Dianan di Pasku ya ta den kurpa i probablemente bo tambe ta preparando kas i kushina pa e dianan aki. E temporada aki atenshon na e parti di komementu sigur no por keda afó. Ya bo por imaginábo kaba e ham, sùlt, ayaka , ‘pan de hamon’, i tur e sobrá otro delisianan. Naturalmente nos tur kier disfrutá di tur e kos dushinan aki, pero ta prudente tambe pa konsiderá nos dieta, ounke nos ta den e temporada dushi aki.
Trata di bebe un glas di awa, pa kada glas di biña. Di e forma aki bo ta bebe mitar di loke lo bo a bebe. Mes lihé ku nos ta dal un glas di biña, òf nos ta bebe un serbes òf limonada, mes lihé e kantidat di kaloria ku esakinan ta kontené tambe ta subi.
Evitá di ches ku aperitivonan manera pan i krèkers. Skohe opshonnan mas salú manera oleifi òf nechi. Ounke un aperitivo ta dushi pa habri e anochi, tene kuenta ku e kuminda prinsipal mes no a subi mesa ainda! Si tòg bo tin gana di kome algu promé, kis pa e opshon ku ta mas saludabel.
Skohe mas berdura pa kompañá bo kuminda. Un salada ta e komplementu ideal banda di karni òf piská. Evitá porshonnan grandi di batata, aros òf pasta mas tantu posibel. E alimentonan aki ta riku na karbohidrato i ta stimulá e sensashon di hamber i ta dunabo mas energia di lokual bo mester.
Siña disfrutá di bo kuminda i saboriá esaki pokopoko. E sensashon di ta yen, ta yega despues di 20 minüt, pues si bo kome muchu purá, lo bo kome bon mirá mas di loke ta nesesario. Kòrda ku mester sobra lugá pa otro kumindanan.
Nos wowonan i nos selebro ta kontribuí grandemente na e kantidat ku nos ta kome. Pues kaminda ta posibel, usa tayónan mas chikitu pa kome. Asina bo ta saka ménos kuminda i nos mente ta haña e sensashon ku e stoma ta yena mas lihé.
Usa ménos sous, zeta òf vèt posibel, esakinan ta kontené hopi kaloria. E batata ku nan a sirbibo no nesesariamente mester bañ’é ku kètsup i mayonès. Purba kome e kuminda manera nan a sirbi esaki. Si tòg e mester di poko mas smak, por añadí salu, peper òf otro spesereinan.
Bai pokopoko durante dia si bo sa ku e anochi ei ta un menú kompletu lo wòrdu sirbí na bo. Tene bo desayuno i lùnch moderá. Despues di e sena ei, evitá bebidanan pisá i yen di kaloria. Na lugá di un ‘cappuccino’ òf un bon ‘latte’, opta pa un simpel èsprèso, un kòfi pretu òf djis un dushi te (sin suku).
Despues di sena, skohe pa bai un aktividat di moveshon, kisas un bon sitio nokturno kaminda bailando bo por kima poko dje kalorianan ku bo a konsumí. Aki atrobe ta konta e regla nr. 1. Trata di bebe un glas di awa pa kada glas di biña. Di e forma aki bo ta bebe mitar di loke lo bo a bebe i bo ta evitá chèns di bira fuma.
Ounke mantené un dieta balansá ta hopi importante pa nos salú, nos mester por disfrutá komo debe ser di tur loke Pasku i dianan di fiesta ta ofresé na kuminda i bebida. Ta un biaha pa aña ta Pasku, pues si nos peka un tiki, no ta kos di hasi drama. Simplemente nos mester tene kuenta pa disfrutá ku e moderashon nesesario.
Kòrda ku ta pisa mas loke nos kome di febrüari pa novèmber, ku loke nos kome den desèmber i yanüari...
Felis dianan di Fiesta!
8 konseho pa realisá un anochi di Pasku saludabel