Konsumidó Alertá Volumen 21, Novèmber-Dezèmber 2015 | Page 14

Meta di e komparashon di èrko aki ta pa brinda konsumidónan informashon pa por hasi un eskoho konsiente na momentu di hasi kompra di un èrko.

Diferente faktor ku ta determiná preis di èrko

Preis di èrko ta wòrdu determiná dor di diferente faktor. Un faktor importante ta e kapasidat di e èrko (kantidat di BTU). Otro faktornan ta entre otro, marka òf vòltahe di e èrko, modèl (inverter òf nò), tipo di garantia èkstra, òf si instalashon ta inkluí den e preis. Un faktor ku awendia sigur ta importante ta gastunan ku lo bo tin na koriente. Fundashon pa Konsumidó ta konsehá un i tur pa tuma bon nota di e tabèl di komparashon di èrko pa asina por hasi un eskoho balansá i efisiente.

Buska informashon di e èrko

Hasi un investigashon promé ku bo disidí pa kumpra bo èrko. Tin algun punto ku sigur bo mester tene kuenta kuné. Semper buska informashon di e marka di èrko. Informashon tokante e kantidat di aña ku e marka ta eksistí por duna bo un bon indikashon si, den futuro, lo bo haña piesa p’e èrko si e daña.

Inventarisá tambe komentarionan ku usuarionan di e marka di èrko ta pone riba internèt. Esakinan ta balioso pa bo sa mas di kalidat i durabilidat di e marka di èrko. Informá tambe pa kondishonnan di servisio i di garantia di e marka di èrko i di e bendedó promé bo kumpra. Pa si dado kaso e èrko daña i mester di drecha bo no bin tende ku no ta bende e marka mas òf no tin piesa mas p’e. Awendia tin, banda di negoshinan spesialisá den benta di èrko, hopi otro establesimentunan ku ta bende èrko. Tene na kuenta den bo eskoho e balanse entre konseho i servisio spesialisá i un preis kisas mas barata.

Kapasidat di èrko

E kapasidat di un èrko ku bo mester ta dependé di e grandura di espasio. Kapasidatnan ku tin di èrko ta 9, 12, 18 i 24 i 30 BTU (Britisch Thermal Unit). Mas haltu e kapasidat, mas karu e èrko ta. Ta sumamente importante pa bo kumpra un èrko di e kapasidat apropiá pa e sitio ku mester fria. Un èrko muchu grandi òf chikí por pone ku e èrko su durabilidat ta bira ménos ku normal, debí ku por ehèmpel e èrko mester traha muchu duru pa mantené e temperatura deseá den e espasio.

Kon pa usa Érko

Pone atenshon na konsumo di

energia i kontrolá e gas den e èrko tambe. Si bo no ta eksperto, yama un profeshonal pa nan bin kontrolá òf yena gas den e aparato. Ekseso di preshon, lèkashe òf otro defektonan por afektá funshonamentu i efektividat di e aparato.

Aislamentu ta e punto klave.

Kontrolá si bo porta i bentananan ta bon será ora bo tin bo èrko sendé. Esaki ta fasilitá e friamentu di e espasio i ta evitá e gastamentu di koriente.

Otro manera pa spar koriente

ta evitá ku e aparato keda sendé ora no tin niun hende den e kamber òf kas. Programá e èrko na un temperatura i ku e ora ku esaki mester stòp òf kuminsá traha bek. Ora bo ta bai drumi, hasi uso di e método di “sleep” òf “night” i asina e aparato ta paga outomátikamente despues di por ehèmpel 6 ora den funshon.

No stoba e parti pafó di e èrko.

Semper evitá tapa e entrada i salida di e airu di e kòmpresor, ya e no tin nodi di traha fòrsá.

Un èrko ta un bon manera pa kombatí kalor den e temporada aki i mantené un temperatura fresku i agradabel den bo kas. Aki ta sigui algun konseho pa yuda bo pa no gasta di mas i hasi un mihó uso di bo èrko.

Bo ta bai instalá un erko na bo kas?

Kompará ora bo ta kumpra, i wak bon kuantu potensha (BTU) bo tin mester promé ku bo kumpra pa no resultá ku e èrko no ta akapará e espasio. Bo tin e aparato kaba, un konseho ta pa bo hasi mihó uzo di esaki. Un regla di oro pa bo redusí uso di bo èrko den e temporada di mas kalor di aña ta di evitá di eksponé e espasio na lus di solo direkto durante di dia. Sera bentana- i kortinanan, asina bo kas lo keda mas fresku.

Hasi mihó uso

No pone fluho di airu friu

direktamente riba e personanan. Esaki no ta agradabel i tampoko bon pa salú di hende. E aparatonan aki normalmente ta permití sirkulashon variabel regularmente i konforme ku e distansha, tantu horizontal komo vertikalmente.

Ahustá temperatura entre

24 y 26 grado Celsius. Esei ta sufisiente pa kombatí e airu kayente sin gastunan haltu di koriente. Si bo pone e èrko na un temperatura di 5 grado mas abou ku e temperatura pafó, lo bo haña kaba e sensashon di airu fresku paden.

Resientemente Fundashon pa Konsumidó a hasi un komparashon di èrko na 10 diferente establesimentu na Kòrsou. Establesimentunan ku a partisipá na e komparashon di èrko aki ta: Baba’s, Building Depot, Fujin Airconditioning CO, Kooyman, La Curacao, Omni, Polytronica, Señor Barata, Top Quality Cooling i Wimco. Un total di 19 marka di èrko a keda kompará. Esakinan ta: Galanz, Fujin, Alaska, Gree, TCL, LG, Midea, Samsung, Panasonic, Westpoint, Frigidaire, Ecox, Premium, Mystic, Royal, Comfort Star, TGM, Trane i Westing House.