Riba 6 di òktober 1975 señornan Ivan Neville de Haseth, Elfried Lucio Aniceto i señoranan Leona Gualbertina Domacassé i Irma Antonia van der Biest dilanti di kandidato-notario Willem Evert Jansen na ofisina di notario Rudolf Johannes Anthony Palm a fundá e fundashon yamá Fundashon di Consumidornan.
Meta di e fundashon tabata pa salvaguardá interesnan di konsumidónan di Kòrsou. Na aña 1998, bou di presidio di señora Ivy Doorstam, hurista bibá na Kòrsou, e nòmber di e fundashon a keda kambiá na Fundashon pa Konsumidó.
40 aña despues, i ku e mesun meta prinsipal, Fundashon pa Konsumidó ta distinguiendo su mes komo un organisashon outónomo, sin vínkulo ku polítika òf religion, i komo e úniko organisashon na Kòrsou ku ta representá nos konsumidónan.
Den su 40 añanan di eksistensia, Fundashon pa Konsumidó a demostrá su valides di eksistensia dor informá, eduká i konsientisá nos konsumidónan pa medio di investigashonnan manera nos komparashonnan di preis, investigashonnan di merkado, i tambe pa medio di kurso, kongreso-, seminario- i programanan di informashon ku nos fundashon ta organisá. Pa ku esaki, pa ami ta un honor pa bisa ku den e aña di lustro aki, pa promé biaha den historia di Fundashon pa Konsumidó, nos lo traha un siklo di 5 programa di televishon, pa asina hasi uzo di e medio mas popular pa yega serka nos konsumidónan.
Pa mi persona ta un honor di por fungi komo direktor di un organisashon asina importante den kada pais desaroyá. Mi ta sumamente konsiente ku tin montañanan di trabou pa move. I ku semper lo tin tenshon entre fondonan disponibel i plannan ku nos ke realisá. Pero mirando e desaroyonan di último añanan, mi ta optimista ku nos metanan pa futuro serkano lo keda realisá. E programa di televishon “Konsumidó Konsiente” ta un stap grandi den e direkshon deseá. Nos lo sigui hasi nos máksimo esfuerso pa sigui bai ku tempu, sigui trese proposishonnan di lei pa protehá e posishon di kada konsumidó, mehorá kondishonnan di kompra i traha duru pa na Kòrsou nos por tin siguransa di ta kumpra produkto- i servisionan di kalidat.
Mi ke terminá ku un felisitashon enorme na personal i direktiva aktual di Fundashon a Konsumidó, i tambe na tur esnan ku den pasado, for di e fundadornan di e fundashon, a duna nan aporte pa logra ku Fundashon pa Konsumidó awe tin su balor enorme di eksistensia.
Editorial
PRÓLOGO
40 AÑA FUNDASHON PA KONSUMIDÓ
Direktor
Fundashon pa Konsumidó
Marc Marshall