Kurso di presupuesto
Fundashon pa Konsumidó ta organisá
Pa di kuater aña konsekutivo Fundashon pa Konsumidó ta organisá kurso di presupuesto grátis pa konsumidónan. E aña aki e kurso ta kuminsá riba djamars 1 di sèptèmber, mitar di 7 di anochi na ofisina di Fundashon pa Konsumidó. Kada kurso ta konsistí di 3 sekshon di 2 ora i mei, riba e dianan di siman djamars, djaweps òf djasabra. Durante di e kurso e kursistanan ta haña elementonan balioso ku por yuda nan manehá nan finansa i siña balansá nan entrada i gastunan mas efisiente. Na final di e kurso kada kursista ku asistí na tur e sekshonnan lo risibí un sertifikado.
Temanan di kurso
Durante di e kurso di presupuesto lo para ketu na kiko ta un presupuesto, kon pa traha un presupuesto i bentahanan di traha un presupuesto. Lo tin espasio pa kada persona para ketu na nan propio situashon finansiero, kiko ta nan entradanan, kiko ta nan gastunan i e forma aktual ku nan ta manehá nan sèn. Un otro aspekto masha importante di e kurso ta e kousa di maneho di sèn. Por ehèmpel tin hende ta gasta sèn ora tin mester so, pero tin otro personanan ku nan kondishon emoshonal tambe por tin influensia riba kon nan ta manehá nan sèn.
E kurso ta brinda kursistanan espasio pa siña den práktika kon pa traha un presupuesto balansá basá riba nan situashon aktual, kombiná ku nan nesesidatnan i deseonan. Kada kursista lo risibí un pakete di material ku nan lo hasi uso di dje pa por sigui e kurso. Na final di e kurso e kursista ta bon prepará pa sigui traha su propio presupuesto riba su mes.
Meta di kurso
Ku e kurso aki Fundashon pa Konsumidó ke empoderá konsumidónan pa por manehá i usa nan sèn na un forma konsiente i responsabel. Nos ke kontribuí na un maneho di finansa saludabel ku ta minimalisá e posibilidat pa nos konsumidónan por haña nan mes konfrontá ku problemanan finansiero, ku tur e konsekuensia ku esaki por tin. Sigur mirando e echo ku últimamente tin hopi konsumidó ta enkontrá problema ku e asina yamá ‘loan shark’. Komo e bos di konsumidónan, nos ta hasi tur esfuerso nesesario pa por informá i eduká nos konsumidónan pa sa i hasi uso di nan derechinan komo konsumidó, pero tambe nos ta motivá nos konsumidónan pa kumpli ku nan debernan komo konsumidó. P’esei nos ta fasilitá nos konsumidónan un medio pa kumpli ku nan deber di manehá nan finansa na un forma responsabel.
Inskripshon
Fundashon pa Konsumidó ta hasi un invitashon na tur ku no a inskribí ainda pa e kurso, pa tuma kontakto ku nos mas lihé posibel, pasobra no a sobra hopi kupo. Puntonan di kontakto ta 462-6666 òf nos i-meil info@fundashonpakonsumidó.org òf pasa hasi nos un bishita na nos ofisina na de Ruyterkade 53. Tur persona ku ke partisipá na e kurso mester registrá adelantá. Hasi uso di e oportunidat aki i tuma e pasonan nesesario pa bo por tin un maneho finansiero responsabel.
Siña traha un presupuesto balansá