kima
DEN CHIKÍ
Di depchi pa florin
Bo tambe ta buskando un entrada èkstra? Hopi biaha nos ta tende nos hendenan ta bisa ku e entrada ku nan tin no ta sufisiente pa por hiba un bida na drechi. Mester paga kas, awa, lus i koriente, kumpra kuminda, paña i tur otro gastunan regular ku un famia ta konfrontá kuné diariamente.
Kiko bo por hasi pa rende e sèn un poko mas? Ke tal si bo purba na saka probecho finansiero di e hòbi òf talento ku bo tin? Algun ehèmpel ta traha bolo, kushiná pa hende, kose paña, traha obra di man, kanta òf toka un instrumènt. Tur kos ta posibel, basta bo ke i ta dediká na dje. Pues, ban mira, lanta ariba i kuminsá move. Bo mes i bo famia lo benefisiá di esaki.
Shòp sabi
Bo no kier gasta demasiado sèn ora bo ta bai di kompra? E mihó solushon ta di sali ku sèn kèsh! Kana ku sèn kèsh den bo pòtmòni ta e manera mas efisiente pa protehá bo mes kontra gastunan impulsivo. No ta tur hende por kontené nan mes ora ku nan sa ku e tarheta di banko òf e tarheta di krédito ta djis den nan saku. P’esei ta bon pa disidí adelantá pa bo mes (nos sa, esaki ta eksigí disiplina) ku awe ta “X” montante so bo ta gasta. Si bo no hasié lo bo ripará ku e pensamentu di “ai, kon ku para keda” por dominá bo fásilmente, i esei ta un pensamentu ideal pa stroba bo plan finansiero.