Promé bo kumpra,chèk
Tepnan pa tenE bo mes na bo presupuesto
Mantené bo mes na un presupuesto no ta fásil, esaki ta eksigí hopi disiplina, dominio propio i perseveransia. Pero si bo logra mantené bo mes na bo presupuesto bo por kontrolá bo finansa i perkurá pa trankilidat den bo bida finansiero. Un presupuesto adekuá por yuda bo manehá bo rekursonan finansiero, spar pa hasi gastunan grandi i prepará bo pa kasonan di urgensia. Den e artíkulo aki nos ta duna bo algun tep balioso pa bo por mantené bo mes na bo presupuesto.
1. Sea realístiko ku bo presupuesto
Si nunka bo no a yega di traha un presupuesto, bo mester kuminsá kalkulá kuantu sèn bo ta risibí i saka kada luna. Mas realístiko bo kalkulá e montantenan aki, mas fásil lo bo por mantené bo mes na bo presupuesto.
2. Distinguí bo nesesidatnan for di bo deseonan
Distinguí bo nesesidatnan for di bo deseonan por yuda bo mantené bo mes na bo presupuesto, prinsipalmente si bo entrada ta hopi serka di bo gastunan. Den esaki bo mester tene kuenta ku bo mester kumpli ku bo nesesidatnan promé, si sobra sèn bo por kumpli ku bo deseonan.
3a. Kalkulá bo entrada mínimo
Den bo presupuesto sea konservativo, i kalkulá bo entrada mas abou posibel. Si resultá ku bo entrada surpasá e montante ku bo a presupuestá ta mihó pa bo! Pero evitá ku bo ta kai korto na entrada, pa motibu ku bo tabata muchu optimista.
3b. Kalkulá bo gastunan máksimo
Aparte di kalkulá bo entrada mas abou posibel, hasi un kalkulashon máksimo di bo gastunan. Esaki lo krea espasio pa si algu inesperá presentá òf si kualke gastu mester subi.
4. Inkluí gastunan imprevisto den bo presupuesto
Pone tur bo gastunan riba un lista i suma nan huntu. Despues, kalkulá 10% di e totalidat i pone den e kategoria imprevisto. Esaki ta duna bo presupuesto mas fleksibilidat i ta yuda bo si bo a lubidá algu den bo kalkulashon pa bo no surpasá bo presupuesto tòg.
5. Inkluí spar komo un gastu den bo presupuesto
Disidí ki montante bo ke spar tur luna i inkluí esaki komo un gastu den bo presupuesto. Traha un kuenta di banko separá pa bo transferí òf depositá sèn riba dje tur luna. Bo por usa bo sèn di spar pa metanan di tempu korto, manera por ehèmpel fakansi òf un karchi di konsierto òf pa metanan riba término largu manera pago di universidat òf kas. Bo por destiná sèn di spar tambe pa paga gastunan imprevisto ku presentá, manera drecha outo òf gastunan médiko.
10 tep balioso pa bo mantené bo mes na bo presupuesto