IATA trahando pa yega na un tamaño universal pa ekipahe di man
Despues ku dia 10 di yüni prensa e publiká e notisia aki, esta ku IATA ta trahando pa bini ku un tamaño standart pa ekipahe di man, KLM a duna di konosé di ta sostené un inisiativa asin’aki, ounke ku pa klientenan di KLM esei lo nifiká ku nan lo tin ku biaha ku ekipahenan di un tamaño mas chikí ku esun ku awor aki ta permití.
Asosiashon di konsumidónan na Hulanda tambe ta haña e inisiativa di IATA un bon idea komo ku esaki ta trese klaridat mirando ku no ta tur hende ta subi wèpsait di e aerolinia pa tuma nota di e midínan pa ekipahe di man. Si nan ta remarká ku mester por garantisá ku e tamaño rekomendá dor di IATA ta un tamaño máksimo; pues ku tur ekipahe di man ku mesun tamaño òf un tamaño mas chikí ta wòrdu aseptá dor di e aerolinianan.
Arke, un aerolinia ku no ta miembro di IATA, a duna di konosé di ta wak e inisiativa aki komo un desaroyo interesante.
E ekipahenan di man nobo ku ta kumpli ku e midínan rekomendá dor di IATA lo mester haña un “IATA Cabin OK” logo ku ta indiká esaki. E logo aki mester hasi konosí na trahadónan di e aerolinianan ku e ekipahe di man ta kumpli ku e midínan rekomendá dor di IATA. E ekipahenan di man ku e logo lo ta disponibel riba merkado den transkurso di e aña aki.
IATA ta ferwagt ku tempu rekonosementu di e IATA Cabin OK logo lo krese, miéntras ku mas aerolinia ta sigui e inisitaiva aki i usa e midínan rekomendá dor di IATA.
Miéntrastantu nos ke rekomendá tur biahero pa promé bo bai di biahe, bo tuma bon nota di e midínan di ekipahe di man ku e aerolinia ku bo ta bula kuné ta usa pa asina evitá e sorpresa desagradabel ku bo no por biaha ku bo ekipahe di man.