Un biaha mas nos ta dilanti di un aña eskolar nobo den kua nos alumnonan, edukadó- i mayornan huntu lo traha riba edukashon di nos muchanan, futuro di nos nashon. Fundashon pa Konsumidó a duna su aporte na esaki ku entre otro nos komparashon di preis ku lo mester sirbi komo un guia pa hasi kompranan di skol den e periodo aki. Di antemano nos ke deseá hopi éksito i forsa na kada un ku ta trata di eduká su mes i su famia. Tambe un deseo di éksito pa e grupo grandi di studiantenan ku a tuma despedida di nan famia resientemente pa bai sigui un estudio den eksterior. Manera semper nos ta konsehá kada studiante pa ta dediká na su estudio i alabes probechá desaroyá su mes komo hende den un ambiente i kultura diferente.
Komo organisashon representadó di konsumidónan di Kòrsou nos ta mira desaroyo i preokupashonnan di último tempu pa ku edukashon i nivel di enseñansa aki na Kòrsou. Komersio, sindikalismo i gobièrnu, tur tin su opinion tokante e manera kon kos no mester bai. Pa yega na un vishon integral di maneho di edukashon, tur gremio i sektor lo mester tin e mes sentido di prioridat i interes na promé lugá, esta enseñansa i edukashon di nos futuro laboral. Hisa nivel di edukashon di nos dosentenan, hasi edukashon aksesibel pa kada mucha, invertí den skolnan di fishi, strukturá i pone direkshon den loke nos ke promové pa nos muchanan bai studia, i asina haña konekshon ku nos merkado laboral. Importante ta pa pone atenshon na sektornan nobo di ekonomia ku rònt mundu ta evolushoná. Informashon teknológiko i komersio elektróniko ta sektornan ku, si nos desaroyá nan mas ainda na Kòrsou, lo krea espasio pa desaroyo ekonómiko nobo.
Mas importante ku tur kos lo keda nos sentido komun komo yu di Kòrsou. Nos mester ta konsiente ku kada unu di nos, dosente, sindikalista i polítiko, mester ta dispuesto na kambia nos manera konvenshonal di pensa i inová i traha huntu pa mehorá nos nivel di edukashon. Fundashon pa Konsumidó lo duna su aporte konstruktivo, i sigur lo keda bringa pa interes i derechinan di konsumidónan den e merkado edukashonal.
Fundashon pa Konsumidó ta deseá un i tur aña eskolar instruktivo i edukativo.
Editorial
PRÓLOGO
KU VISHON
DEN EDUKASHON