Tin hopi sait riba internèt ku ta primintí milagernan ora ta trata di pèrdè peso ku batido òf remplasante pa kuminda. Nan ta primintí: “Baha hopi kilo den un par di siman, sin ningun molèster i bastante saludabel”. Bebe batidonan speshal, por yuda pa pèrdè peso, pero pèrkurá si pa bo haña sufisiente vitamina i mineral den bo kurpa.
Kon pa baha di peso ku batido?
Por usa batido komo remplasante di kuminda. Por ehèmpel na lugá di desayuno, almuerso i sena bo ta bebe un batido, sòpi òf un snèkbar. Kuantu kuminda por sustituí ku batido ta dependé di e programa di konsumo ku bo ta usa. Den algun programa esaki por ta un òf dos, i den otronan esaki por ta hasta tres kuminda. Pa intermedio tambe tin diferente produkto ku por skohe.
Generalmente batido ta kontené ménos kaloria ku un kuminda. Esaki ta redusí e konsumo total di kaloria di hinter un dia i asina bo por pèrdè peso. Kuantu peso bo por pèrdè ta dependé di loke bo kome aserka.
Baha di peso ku batido
Proteina
Hopi dieta ta rekomendá pa kome mas proteina,
manera piská, galiña, keshi, webu, lechi, broccoli,
bonchi, spinazi i nechi. Pasobra proteina ta mas difísil
pa digerí, i bo ta keda mas largu ku e sensashon ku bo
ta yen. Esaki ta e idea tras di e batidonan ku ta riku na proteina.
Hopi sait ta kleim ku pèrdèmentu di peso ku batido no ta niun tiki difísil, pasobra
bo no ta eksperensiá e sintimentu di hamber i bo ta sinti bo satisfecho. Nan ta splika
ku faktornan manera, e kantidat di kuminda ku bo kome, kuantu bia bo ta kou i
grandura di bo stoma tin influensia riba e sintimentu ku bo ta yen. Tambe nan ta indiká
ku despues di bebe un batido, bo por sinti e sensashon di tin hamber hopi lihé. Den e kaso ei nan ta rekomendá pa kome un snèkbar komo intermedio.
Un otro ponensia ku ta bini dilanti ta ku batido, komo ku e ta riku na proteina ta yuda pa fortifiká spir. E ta hasi ku niun spir no ta bai pèrdí durante di e proseso di baha peso. Spirnan ta konsistí pa gran parti dor di proteina, pero nan ta krese únikamente ora ku bo trein nan.
Benefisionan di bahamentu di peso ku batido:
• Batido i otro remplasante pa kuminda ta kontené por lo general hopi tiki kaloria, dor di esaki e chèns pa
pèrdè peso ta hopi grandi.
• Mayoria bia porshonnan pa traha batido ta prepará adelantá, esaki ta fasilitá bo i ta motivá bo pa
mantené bo mes na e midi adekuá. Pues e ta minimalisá e espasio pa bo konsumí demasiado batido.
• Generalmente batido ta smak zut. Esaki ta pone personanan ku beb’é eksperensié komo dushi.
• Por lo general batido ta fásil pa bo prepará. Solamente bo mester kombertié den líkido (ku awa, yògert òf lechi).