Probechando di e ofertanan di Black Friday, konsumidó a kumpra entre otro un frishidèr, stof i microwave kombo. Ku e kompania konsumidó a palabrá ku lo warda e artíkulonan p’e te dia e por bin tuma esakinan. Dia ku mester a entregá esakinan sinenbargo ta resultá ku e kompania ta entregá un otro frishidèrfor for di loke konsumidó a kumpra, ya ku pa un deskuido a bende esun ku konsumidó a kumpra, i e kompania no tabatin mas den stòk. Kon ku bai bini, konsumidó a logra negoshá ku e kompania i a yega na un akuerdo pa un otro frishidèr.
Ora e kompania a bai pa entregá e sobra artíkulonan ku konsumidó a kumpra i reservá, konsumidó ta nota sinembargo ku atrobe un dje artíkulonan, e microwave kombo, ku a ser entregá, no ta loke el a kumpra. Mesora konsumidó a tuma kontakto ku enegoshi pa informá nan di e fayo aki. Aparentemente durante di e lokura di Black Friday e kompania a brua i a preis e microwave kombo robes. Ora e kliente a bai reklamá e produkto, kompania ta splik’é ku nan a hasi un fout den preis i kódigo di e microwave kombo. Si ainda konsumidó ke e model di microwave kombo ku e la “kumpra” riba Black Friday, e lo tin di paga èkstra. Konsumidó lo tin di paga awor e diferensha di e preis ku e la paga i e preis aktual di e artikulo. Korektamente konsumidó no a bai di akuerdo ku esaki, ya ku na su opinion e no mag di sali perhudiká pa un fout ku e kompania a hasi. Konsumidó a pone su oferta riba mesa, pero esaki no tabata akseptabel pa e kompania. Di otro banda e kompania no ta kier a duna konsumidó su sèn bek tampoko. Mirando ku partidonan no ta saliendo for di e dilema aki, tur dos a tuma kontakto ku nos Fundashon pa intermediashon.
Pa Fundashon pa Konsumido por a huzga ekaso mas mihó, nos a pidi e kompania pa nan vershon di e problema pa nos por tin sigur ken ta robes den e kaso aki. E kompania ta splika nos ku en bèrdat e fayo a sosedé serka nan, pero mirando kon e kosnan a bai (konsumido a tarda kasi 4 luna pa por a laga entregá e merkansianan) nan ta dispuesto pa kumpli ku konsumidó, pero kier pa e kliente paga un montante mas haltu ku loke e kliente a proponé òf nan por dun’é un tegoedbon.
Fundashon pa Konsumidó ta splika e kompania e ora ei ku si e fout en bèrdat ta di e kompania, anto e ora ei e kompania no ta den posishon di ta pone kondishon den e kaso aki. Si e konsumidó ta haña ku e no por paga e montante ku kompania ta pidi, e tin derechi di kibra e konvenio i pidi su SEN bek, ya ku e kompra no a resultá loke e la espera di esaki. (Buki 7 art. 21 di nos Kódigo Sivil nobo).
Pues den e kaso aki ta 2 opshon tin:
1. aseptá e oferta di konsumidó manera ya e la
indiká òf
2. disolvé e kompra i duna e kliente su sèn bèk.
E konsumidó di ningun manera por ta e partido pèrdèdó den e kaso aki.
Despues di un análisis interno, e kompania a informá Fundashon pa Konsumidó ku nan ta aseptá e oferta di e konsumidó, basta e por trese e produkto ku e tin aktualmente intakto bèk, manera e kompania a entreg’é.
Algun punto di atenshon pa nos konsumidónan i tambe komersiantenan:
Konsumidó:
- Informá adelantá si tin e posibilidat pa warda
artíkulonan pa entrega mas despues.
Komersiante:
- Palabra adelantá un tèrmino máksimo ku e
konsumidó tin pa bin buska su artíkulonan.
- Si kompania ta kobra un suma pa gastu di
almasenahe, e mester informá e konsumidó
adelantá tokante di esaki. No warda pa ora kos
pega, pa bin kobra esaki.
- Pone tur palabrashon èkstra riba papel.
Konsumidó i komersiante:
- Por último, tene kuenta ku tegoedbon no ta para
den lei, ora e konsumidó ta den su derechi. Un
kompania por duna un tegoedbon unikamente
den kaso ku ta e konsumidó a kumpra un
produkto robes. Por ehèmpel, e kliente a kumpra
produkto A kaminda ta produkto B e ta tin mester.
Den un kaso asina, e komersiante por disidí di su
boluntat ku e ta kambia e produkto òf por duna
un tegoedbon. E no tin obligashon di dunabo bo
sèn bek!
Komersiante tin e obligashon di kumpli ku loke a keda akordá. Si di un òf otro forma e no por kumpli ku e akuerdo, konsumidó tin derechi di disolvé e kombenio i pidi su sèn bek!