NOTISIA
Disposishonnan tokante prevenshon di ekstenshon eksesivo di krédito
Ekstenshon eksesivo di krédito ta un problema ku por ruina bidanan. Krédito den ekseso ta nifiká ku e persona ta den un situashon di debe i no por paga bèk. Pa prevení ku personanan ta fia pa loko anto ora kaba haña nan mes den un sírkulo visioso di debe sin por sali afó ku tur konsekuensia ku esaki ta trese kuné, Banko Sentral a bini ku reglanan adishonal.
E desishon di e persona òf instansia ku ta duna fiansa pa ekstendé krédito di konsumo mester ta basá riba por lo ménos:
- un maneho di aseptashon ku a wòrdu aprobá dor
di e organo mas haltu di e instansia ku ta
ekstendé krédito, ku tin komo meta, entre otro, pa
prevení ekstenshon eksesívo di krédito; i
- un evaluashon rigoroso ku ta reflehá ku a haña ku
e konsumidó lo por paga bèk e krédito ku a
wòrdu ekstendé ne.
E maneho di aseptashon lo mester rekerí ku por lo ménos e siguiente informashon tokante e konsumidó mester wòrdu inkluí den kada fail individual:
- un analisis di entrada i gastunanan di e individuo;
- informashon di fondo di e individuo;
- e propósito di e petishon pa krédito;
- e montante total aktual di krédito i elementonan
di kual esaki ta konsistí; i
- historia di krédito (den kual mester tin montante i
durashon di krédito(nan), i historia di málpago.
E persona- of instansianan ku ta ekstendé krédito mester optené sufisiente informashon tokante e situashon finansiero pa asiná evaluá si e konsumidó por paga bèk. Petishonnan pa krédito ku a wòrdu aseptá mester ta bon dokumentá i mester por keda supstansiá klaramente ku e konsumidó por paga bèk.
E persona- i instansianan ku ta ekstendé krédito tambe mester tuma medidanan apropiá pa promové práktinanan responsabel di ekstenshon di krédito durante e relashon di krédito i mester tene konsiderashon ku tur otro reglanan relevante (por ehèmpel artíkulo 7A:1614g di nos Kódigo Sivíl a base di kua persona- òf instansianan ku ta ekstendé krédito no tin mag di eksihí mas ku un terser parti di e salario mensual nèto di e konsumidó komo pago) promé ku ekstendé krédito.
Tin dos situashon den kual e persona òf instansia ku ta ekstendé krédito mester nenga di aseptá petishon pa krédito di e konsumidó. Esaki ta si:
- E pagonan mensual di tur krédito habrí òf futuro
ta surpasá e TDSR di 37% (TDSR ta para pa “Total Debt Service Ratio” i ta nifiká e proporshon ku ta wòrdu ekspresá komo e gastunan mensual di kas plus tur otro servisio di debe, inkluso pagonan pa fiansa di outo, finansiamentu di estudio i tarhetanan di krédito, dividí ku e entrada mensual bruto);
- E informashon tokante e situashon finansiero
optené for di entre otro e konsumidó, ta duna indikashon ku krédito adishonal por hiba na un situashon di ekstenshon eksesivo di krédito.
Den e kaso ku e persona òf instansia ku ta ekstendé krédito desviá for di esaki i ekstendé krédito no opstante ku ta trata di un di e dos puntonan ariba menshoná, esaki tin ku wòrdu motivá i dokumentá debidamente.
Reglanan nobo di
Den e edishon anterior di nos Konsumidó Alertá nos a trata un di tres disposishonnan ku Banko Sentral a emití i ku entre tantu a drenta na vigor
entrante 1 di mei 2015. E tres disposishonnan aki ta trata reglanan ku persona òf instansianan ku ta ekstendé krédito na konsumidónan mester tene kuenta kuné i tene nan mes na dje. Pa esunnan ku no a lesa e edishon anterior nos ta rekomendá bo pa lesa e artíkulo "Fin di Loan Sharing" den kua nos ta splika e disposihonnan titulá “Disposishonnan aktualisá tokante dibulgashon di informashon di preis di krédito di konsumo”. Den e edishon aki nos lo trata e di dos disposishonnan ku a drenta na vigor 1 di mei 2015, kual ta: “Disposishonnan tokante prevenshon di ekstenshon eksesivo di krédito”.