Hasi kambionan na e kas
Un otro obligashon ku e hürdó tin ta pa no hasi kambio na e kas sin outorisashon por eskrito di e doño di kas, a ménos ku ta kambionan ku sin muchu gastu na final di e kombenio di hür por wòrdu anulá según artíkulo 7:215 insiso 1 di nos Kódigo Sivíl. Esaki sigur ta hopi importante pa sa. Hopi biaha tin personanan, komo ku nan tin hopi aña bibando den un kas di hür, ta kuminsá hasi kambionan basta drástiko na e kas ku nan ta hür sin tene kuenta ku un dia nan tin ku entregá e kas bèk na su doño.
Sinembargo, ora ta trata un kas ku e hürdó ta biba aden i no djis un edifisio, e doño di kas den 8 siman mester duna su outorisashon pa hasi e kambionan si e kambionan proponé no ta hasi daño na e abilidat pa hür e kas despues, no ta pone ku e kas ta baha di balor òf no tin otro rasonan di peso a base di kual e por oponé e kambionan ku e hürdó ke hasi según artíkulo 7:215 insiso 2 di nos Kódigo Sivíl.
Den e kaso ku e doño di kas nenga di duna outorisashon pa hasi e kambionan, e doño por pidi korte pa dun’e outorisashon pa hasi e kambionan tòg, no opstante ku e doño di kas ta ninga di hasi di akuerdo según artíkulo 7:215 insiso 3 di nos Kódigo Sivíl. Korda bon si ku si e doño di kas no duna abo outorisashon pa hasi kambionan na e kas, bo tin ku bai korte i no djis hasi e kambionan apesar di opheshon di e doño di kas.
Korte ta bai di akuerdo ku bo petishon di e doño di kas a base di insiso 2 di artíkulo 7:215 mester a duna outorisashon pa e kambionan según artíkulo 7:215 insiso 4 di nos Kódigo Sivíl. Den tur otro sirkunstansia korte ta duna outorisashon solamente si e kambionan ta nesesario pa e hürdo por hasi uso di e kas na un forma efikas, e kambionan ta hasi bibamentu den e kas mas plasentero i no tin opheshonnan di peso di parti di e doño di kas pa oponé e kambionan ku e hürdó ke hasi.
Sí ta asina ku korte por imponé sierto kondishonnan na e outorisashon pa hasi e kambionan, por ehèmpel eksihí ku e hürdó ta paga un preis di hür mas haltu si e kambionan ta duna motibu pa esaki según artíkulo 7:215 insiso 5 di nos Kódigo Sivíl.
Den nos siguiente edishon di Konsumidó Alertá nos lo sigui ku e di dos parti di “Bo debernan komo un bon hürdó.