DERECHI I DEBER
Bo debernan komo un bon hürdÓ
Ora dos partido sera un kombenio ku otro, a base di e kombenio ei tur dos partido tin derechinan i debernan. Esaki no ta otro pa loke ta trata hürmentu di kas. E doño di kas tin debernan komo e ta doño di kas, pero tambe e hürdó tin obligashonnan komo e persona ku ta biba den e kas. Den e artíkulo aki nos ta bai pone atenshon riba e debernan òf obligashonnan ku a base di lei kada hürdó tin ku kumpli ku ne.
Den nos Kódigo Sivíl nos ta enkontrá e oblishonnan ku e hürdó tin, espesífikamente den sekshon 3 di titulo 4 di Buki 7.
Paga bo hür na tempu
Primeramente, e hürdó tin e deber pa kumpli ku e kóntraprestashon na e manera i momento ku a kombení, según artíkulo 7:212 di nos Kódigo Sivíl. Den mayoria kaso, e kóntraprestashon ta konsistí di paga hür na doño di e kas. Esaki pues mester sosodé na e manera i na e momentu ku bo a kombení ku e doño di kas. Kemen, si abo komo hürdó i e doño di kas a kombiní ku promé ku dia 3 dia kada luna bo mester paga e montante ku bosnan a kombiní komo hür, bo tin e deber pa kumpli ku esaki. Si bo paga un montante ménos ku e montante ku bosnan a kombiní na hür òf bo paga lat, bo no ta kumpliendo ku e debernan ku a base di lei bo tin komo hürdó i esaki por ta un rason ku e doño di kas por terminá e kombenio di hür.
Komportá bo mes komo un bon hürdó
Pa loke ta trata uso di e kas, lei ta dikta den artíkulo 7:213 di nos Kódigo Sivíl ku e hürdó tin e deber pa komportá su mes komo un bon hürdó. Esaki ta enserá entre otro ku e hürdó tin ku kuida e kas i no sòru pa molèster. Si tin reglanan adishonal ku el a kombiní ku e doño di kas, manera ku e no tin mag di tin bestia di kas, e hürdó tin ku kumpli ku esakinan.
Uso según a palabrá òf según propósito
E hürdó tin ku usa e kas manera a wòrdu kombiní según artíkulo 7:214 di nos Kódigo Sivíl. Si no tin palabrashon tokante uso di e edifisio, e hürdó tin ku usa e edifisio segün propósito di e edifisio. Pues e no por kambia e edifisio ku el a hür komo un kas pa biba aden i bai drai un negoshi den dje.