Laga nos mira e punto di bista di Aqualectra den e kaso aki kaminda Aqualectra ta alegá ku tin otro formanan pa paga bo kuenta ku sèn kèsh por medio di kompanianan manera Pagafásil i Pagomátiko. Loke Aqualectra no ta tene kuenta kuné ta ku e sistemanan aki ta bai via un partido tersero i Aqualectra no ta garantisá e proseso komo risibidó na momentu ku algu no bai korekto. Esaki nos a eksperensiá resien na momentu ku e kompania Servei Bo Servisio B.V. a aseptá pagonan di konsumidónan i no a pasa e sèn aki pa Aqualectra. Si e transakshon lo a keda hasí via banko di e konsumidó ainda esaki por a bai reklamá su banko. I aki nos ta yega na un punto esensial. Akseso na un kuenta di banko no ta algu ku tur konsumidó tin derechi riba dje ainda na Kòrsou. Lesa pa ku esaki e artíkulo den e sekshon di “Intermedio” den e revista aki.
Pa termina, si nos trata e desishon di Aqualectra a base di e tres faktornan ariba menshoná nos por konkluí ku un konsumidó no tin eskoho di disponibilidat di kis pa un otro kompania mirando e posishon di monopolio ku Aqualectra tin pa ku suministro di awa i elektrisidat. I mirando ku den e kontrakt pa suministro di awa i koriente entre Aqualectra i e konsumidó no tin nada kombení adelantá tokante forma di pago, Aqualectra no por ninga un konsumidó ku ke paga su kuenta di utilidat ku su sèn kèsh.