Aqualectra por ninga mi pago kèsh?
IMPOSIBEL
Na aña 2014 korte na Hulanda a duna veredikto den un kaso kaminda un persona kier a paga un debe ku un montante di EUR 20.060,40 kèsh. Esun ku e persona mester a paga no kier a aseptá e suma den efektivo i a kuminsá un kaso kontra di e debedó pa eksihí ku e montante mester keda pagá via banko. Korte a disidí den e kaso aki ku e kobradó no por eksigí di e pagadó pa paga na e forma ku e ta dikta. Si e kobradó lo tabata ke esaki, mester a palabrá esaki na momentu di ku a sera e kombenio. E veredikto aki ta trese un dimenshon nobo den e diskushon ku rònt mundu ta andando tokante aseptashon di plaka kèsh kaminda komersiantenan ta trata di stipulá reglanan di pago den nan negoshinan.
Algun faktor ta importante den e proseso aki. Esakinan ta: e eskoho ku un konsumidó tin, anunsio adelantá di formanan di pago promé ku bo hasi e transakshon, i hopi importante e tipo di kombenio ku ta eksistí entre e komersiante i e konsumidó.
Eskoho di e konsumidó
Si un produkto òf servisio ta keda bendé pa mas ku un negoshi, ningamentu di aseptá plaka kèsh dor di un negoshi no tin efekto riba e disponibilidat di e produkto òf servisio pa un konsumidó. Si un toko òf minimarket disidí ku e ta aseptá solamente pago via swaip, pa motibunan di seguridat, abo konsumidó por skohe pa bai un otro toko pa hasi bo kompra. Bo tin mas ku un opshon pa por yega na un produkto òf servisio di e mesun kalidat. Ta na e komersiante si e ta riesga su benta a base di su konsiderashon pa ku medidanan di seguridat pa su negoshi. Pa e konsumidó e produkto òf servisio ta disponibel na otro negoshi.
Anunsio adelantá
Si mi drenta den un pakus i na porta ta keda indiká, pa medio di un steker ku e negoshi no ta akseptá papel di fl. 100,= òf mas grandi, el a indiká esaki adelantá. Meskos ku tin negoshinan ku ta pone steker di formanan di pago ku nan ta aseptá (diferente tipo di credit card i debit card) e por pone tambe ku por ehèmpel e no ta aseptá sèn kèsh. Otro ta si, sí bo yega na kaha pa paga i na e momentu ei e komersiante ta disidí ku e no ta aseptá bo sèn kèsh. E anunsio semper mester a keda hasí adelantá.
E tipo di kombenio
Manera indiká na inisio, e tipo di kombenio ta hopi importante pa por konkluí si un komersiante por ninga un pago en efektivo. Si na momentu ku un kombenio keda será, sea ta un suskripshon òf un kontrakt di utilidat, telefon òf internèt, nada keda palabrá entre e dos partidonan pa ku forma di pago, un konsumidó por paga ku un moneda koriente, esta florin Antiano.