Un kontribushon di
Mi tin derechi riba un kuenta di banko?
Otro ta si bo ta mará na otro komo konsumidó i kompania, a base di un kontrakt, pa kumpra i bende un servisio. Ta imposibel e ora ei pa unilateralmente bo kambia e kondishonnan di e areglo entre dos partido.
Loke ainda ta mas importante ta e hecho ku na paisnan manera Hulanda akseso na un kuenta di banko ta algu ku a keda reglá den un kombenio. Asosashon di Bankonan Hulandes (Nederlandse Vereniging van Banken, NVB) na aña 2001 a sera un kombenio, den estrecho konsulta ku Ministerio di Finansa, ku organisashonnan ku ta representá suidadanonan di ménos rekurso manera Leger des Heils, pa hasi posibel pa kada suidadano disponé di un kuenta di banko, e asina yamá basisrekening. Akseso na un kuenta básiko ta posibel hasta si bo ta un persona yen di debe òf bo ta un persona sin hogar.
Un kuenta di banko ta birando algu indespensabel pa un persona por aktua den nos komunidat. Sin un kuenta di banko i un tarheta di banko, un persona no por hasi uzo di tráfiko di pago moderno manera risibí su salario òf penshun, lanta sèn for di un bankomátiko òf paga su kuentanan via banko. Esaki ta trese kuné ku un konsumidó sin un kuenta ta hañ’é obligá di kobra na plaka kèsh òf ku chèk. E mester para den rei na banko pa kobra su chèk i pa hasi tur su transakshonnan di pago di su debenan tur luna.
Konsumidónan Internashonal (Consumers International) for di aña 2012 a traha riba un proyekto den Karibe den kua akseso na un kuenta di banko pa kada konsumidó tabata un di e metanan prinsipal. Na paisnan manera Jamaica i Barbados, na unda protekshon di konsumidó ta riba un nivel mas haltu, a yega na un akuerdo pa traha riba un kódigo di kondukta den sektor bankario pa asina hisa e nivel di servisio i tambe pa reforsá transparensia i protekshon di konsumidónan.
Aki na Kòrsou, Fundashon pa Konsumidó lo aserká Asosiashon di Bankero di Kòrsou pa kuminsá ku kombersashonnan pa yega na un kódigo di kondukta similar. E kódigo aki lo enserá banda di akseso na un kuenta di banko no diskriminatorio, tambe aspektonan manera stándartnan di servisio, informashon transparente di produkto i servisio, informashon di krédito, kambionan di tarifa i gastunan bankario, provishonnan pa nos ansiano- i desabilitánan, i un resolushon pa regla keho- i disputanan.
Aña pasá Fundashon pa Konsumidó a yega na un akuerdo similar ku Curaçao and Bonaire Insurance Association den forma di un kódigo di kondukta i un komishon di keho. E intenshon ta pa yega na un areglo similar ku Asosiashon di Bankero di Kòrsou. E punto di lansa di e kombersashon sigur lo enfoká na promé instansia riba akseso na un kuenta di banko pa kada konsumidó.
E desishon di e úniko kompania di utilidat di Kòrsou pa no aseptá pago kèsh na ofisina di Aqualectra a revivá e diskushon di e derechi di kada konsumidó riba un kuenta di banko. Na hopi pais na mundu nos ta mira e tendensia ku negoshinan ta ninga pago di transakshon ku plaka kèsh. Un tienda por ninga di aseptá sèn kèsh tanten ku e avisá e konsumidó adelantá ku un steker riba su bentana por ehèmpel. E konsumidó ku ke paga kèsh tin e opshon pa kumpra su produkto òf servisio na un otro negoshi.