Den e sekshon Imposibel e luna aki un kaso di un konsumidó ku a buska su asistensha i intermediashon di Fundashon pa Konsumidó na momentu ku e la sinti ku su derechinan ta wòrdu trapá.
Ta asina ku na desèmber 2014 kliente a kumpra un outo nobo na un kompania di outo lokal ku segun e ta relatá, fo’i komienso tabatin un zonido straño. Mesora konsumidó a kuminsá hasi su reklamonan mirando ku ta outo nobo e la kumpra i e no ta supose di tin problema den apénas dos luna di tempu. Konsumidó a hiba su outo mas ku 8 biaha pa inspekshon pero kada bes e ekspertonan tabata bis’é ku e outo no falta nada. Tòg konsumidó tabata keda persistí ku e vehíkulo tin un zonido den esaki. Pa purba remediá e situashon, e kompania a kambia algun piesa na a outo pero tòg ketu bai konsumidó tabata sigui sinti e problema.
Fada di hinter e situashon aki i mirando ku e outo ainda ta den garantia, konsumidó a pidi e kompania pa disolvé e konvenio di kompra i dun’é su sèn bek. Despues di basta papiamentu i negoshashon, e kompania a bai di akuerdo pa duna konsumidó su sèn bek pero ta ke kita 10% for di e montante pagá.
Konsumidó naturalmente no a bai di akuerdo ku esaki ya ku aki ta trata di un outo ku defisiensia i no un simpel trade-in” i lei ta indiká bon kla kiko ta e derechinan di un konsumidó dado kaso e sinti ku e produkto ku e la kumpra no ta kumpli ku su ekspektativanan. Den un kaso normal e kompania lo mester a kambia e outo pa un otro i si no tin unu igual, duna konsumidó su sèn kompletu bek.
No konforme ku e desishon aki, i maske konsumidó a firma un karta ku ta bisa di ta bai di akuerdo pa disolvé e konvenio kitando e 10%, konsumidó a buska asesoria di nos fundashon pa e tin sigur ku e ta aktuando konforme su derechinan.
Fundashon pa Konsumidó a tuma kontakto mesora ku e kompania pa tende e otro banda di e medaya. Tambe nos a konsehá nos kliente pa no tuma niun sèn, ya ku si e dal e stap ei, por wòrdu konsiderá ku e la bai di akuerdo ku e oferta presentá. Fundashon pa Konsumidó a bolbe splika e kompania di tur e inkonbeniensianan ku e outo aki a kousa e kliente, I ku defakto nunka nos kliente a echt disfrutá di su outo mirando ku e outo tabata mas na garashi para ku den su kura di kas. Tambe nos a bolbe aksentuá ku mekánikonan di e kompania mes tambe a sinti e problemanan ku a outo tin, i ku den e kaso aki no por bisa ku ta idea di nos kliente. Di ningun manera ta hustifikabel ku kier kita awor 10% for di e sèn ku a paga pa e outo, siendo nos ta papia aki di un outo ku defisiensia.
Despues di un evaluashon interno, e kompania di outo a informá ku e ta duna konsumidó e montante di sèn kompletu bek.
Algun punto Importante pa tene kuenta kuné:
Nunka aseptá un dil òf oferta ku bo no ta di akuerdo kuné, djis pa skapa di un problema. Den e kaso aki, e manera ku e kompania kier a resolvé e kaso aki no ta kuadra ku nos leinan i ta pas mas den kaso ku ta e konsumidó kier bini bèk riba e kompra hasi, loke den e relato aki no ta e kaso. Lei ta protehá un konsumidó dado kaso e kompra hasí, resultá defisiente. Den e kaso aki e kompania lo mester a sea duna konsumidó un outo nobo òf su sèn pagá bek!
Mas aleu:
- kualke defekto ku bo sinti na bo outo, mèldu
esaki de inmediato na e kompania.
- nota tur biaha ku e outo bai pa kontròl.
- pidi por eskrito tur loke a wòrdu drecha òf kambia
na e outo.
- si bo outo ta den garantia, mester drecha
defektonan sin gastu algun.
- ounke kiko pasa, no laga otro mekániko òf hende
straño wak bo outo, esaki por afektá bo garantia.
- Por último, si bo no tin sigur di bo derechinan,
buska asesoria òf konseho pa bo ta bon informá.