Fushon i poder di merkado
Un fushon di dos kompania ku ta kompetí ku otro ta nifiká un kontrinkante ménos den e sektor di merkado konserní. Sigur den sektornan kaminda ya kaba tin tiki kompetidor manera e sektor di telekomunikashon, esaki por trese kuné un konsentrashon di poder ku hopi biaha no ta na fabor di e konsumidó. Un konsentrashon di poder asina por duna un kompania e benefisio di por fiha preisnan pa konsumidó ku no ta den nos benefisio. Sea ta muchu haltu òf muchu abou. Un kompetidó grandi por duna su mes e luho, por ehèmpel, di baha su preisnan temporal pa asina saka e tiki kompetidónan for di merkado. Atrayendo hopi kliente na un preis òf tarifa mas abou i, sakando asina su kompetidó for di merkado. Asina e logra saka tur su kompetidónan e lo tin e posishon pa fiha e preis ku e ke i esaki hopi biaha ta mas haltu ku na momentu ku tin un kompetensia sano riba e merkado.
Outoridat di Kompetensia
Aki gobièrnu tin un ròl klave pa sòru ku kada sektor di merkado òf tin kompetensia honesto i sano òf ta keda regulá dor di gobièrnu pa asina salvaguardá e akseso na un merkado transparente di kada konsumidó. Gobièrnu tin e opshonnan pa regulá sierto sektor di merkado (koriente, makutu básiko, remedi), pone sierto restrikshonnan (kuratela pèrmit Minimarket) pero tambe e por disidí di pa e mes sòru pa sierto produkto i servisio keda duná na konsumidónan. Loke ta hopi usual na paisnan rònt mundu awendia ta institushon di organisashonnan independiente ku tin komo tarea pa sòru pa merkadonan ekonómiko lokal keda transparente i den balanse. Un outoridat di Kompetensia ta enkargá su mes pa investigá kasonan di abuso di un posishon dominante riba merkado, prinsipalmente investigá i sanshoná kasonan di kolushon manera kartelnan di preis, repartishon di merkado entre kompanianan i tur otro kombenio òf afspraknan ku ta den desbentaha di e konsumidó kumpradó.
Leinan antimonopolista ta leinan ku ta regulá komersio mediante di prohibishonnan di monopolio, restrikshonnan ekonómiko artifisial, i fihamentu di preis. E leinan aki ta traha ku e intenshon pa promové kompetensia entre empresanan riba mèrkado y fomentá kalidat di produkto- i servisionan na mihó preis posibel, garantisando un struktura di merkado efisiente. Komo konsumidó di produkto- i servisionan riba un merkado, leinan antimonopolista tin efekto riba nos tur dia. Si ta un kòmpiuter òf seguro bo ke kumpra.
Na Kòrsou gobièrnu ya pa algun aña a bini ku un konsepto di Lei di Kompetensia i nos ta pendiente di e lei di Protekshon di Konsumidó ku lo instituí un Outoridat di Konsumidó ku tin un tarea otro for di e Outoridat di Kompetensha. Esta, sòru pa e relashon entre kompanianan komersial i konsumidó ta unu transparente i honesto i kaminda kada konsumidó tin e derechi i kaminda pa kana ora e tin un reklamo tokante un produkto of servisio ku e la kumpra.