NOTISIA
Den e luna di yanüari un notisia ku a hala hopi atenshon ta ku konsumidónan di e produktonan di Lovers a bin ta reklamá ku últimamente e produktonan tin un smak straño. Algun konsumidó tabatin e impreshon ku e produktonan ta hole straño i ku e produktonan tin un smak kímiko. Segun un artíkulo den e korant Amigoe fechá 14 yanüari 2015 probablemente e smak kímiko i e holó straño di e diferente produktonan di Lovers ta wòrdu okashoná dor di e prent riba e empake. Segun e direktor di Lovers señor Oswald van der Dijs den dezèmber a kambia e teknologia di prent i ku nan ta asumí ku e holó fuerte di e enk ta pasa dor di e empake pa e kontenido. Segun e direktor sinembargo esaki no ta trese ningun rísiko pa salú di e konsumidó kuné.
E instansia di Geneeskunde & Gezondheidszaken (G&GZ), ántes GGD, entretantu tin un investigashon andando pa loke ta e smak straño di e produktonan di Lovers ku a wòrdu raportá. A kohe mònster di e diferente produktonan di Lovers pa asina manda nan laboratorio pa wak kiko ta e orígen di e smak straño anto si e produktonan ta seif pa konsumo. E investigashon di e instansia G&GZ mientrastantu ainda ta kanando. Sí e instansia por a komprobá kaba ku en bèrdat e produktonan di Lovers tin un holó i smak straño, pero e resultadonan konkreto di e investigashon ainda no a drenta. Direktor di e servisio di G&GZ, señor Sirving Keli, a remarká ku kisas e kualidat di e empake no ta bon lokual tin komo konsekuensia ku supstansianan manera enk por pasa dor di empake den e kontenido.
Lovers di su banda a tuma e desishon di saka su produktonan despues di un par di dia for di rèki pa evitá asina ku e smak i holó di e produkto ta wòrdu afektá. Segun e direktor di Lovers, Lovers ta sigui bende su produktonan normal pero lo saka nan mas lihé for di supermerkado, un medida ku direktor di G&GZ ta gaba. Sinembargo segun e direktor di G&GZ awor e kos di mas importante ta pa saka afó ta kua ta e supstansianan ku a penetrá dor di e empake den e kontenido i si esaki ta dañino pa salú di e konsumidó.
Pa Fundashon pa Konsumidó na promé lugá ta konta ku kada konsumidó tin derechi riba produktonan ku ta seif, sigur si ta trata produktonan di konsumo. Un konsumidó mester tin e konfiansa ku loke e kumpra pa kome i bebe no ta dañino pa su salú. E bienestar di e konsumidó mester ta na tur momentu na promé lugá. Mas lógiko lo tabata pa saka, pa tur siguridat, e produktonan for di benta tanten ku e investigashon ta kanando i no tin 100% seguridat ku e produktonan ta seif pa konsumo. Esaki sin ke kita outoridat ni kompetensha di ekspertonan di G&GZ. Fundashon pa Konsumidó a trata, pa ku e tópiko aki, di drenta den kontakto ku direktor di G&GZ pa tende nan vershon di e investigashon, sin un resultado positivo.
Asumiendo ku a base di su ekspertisio G&GZ a hasi un estimashon di e situashon prudente, di nos banda nos ta keda pendiente di e resultadonan di e investigashon i buska pa yega na e informashon aki. Asina nos sa mas nos lo informá nos konsumidónan.
Djus di Lovers ta smak straÑo?