Rasenchi, òf drùif seku, ta un pasa boka saludabel... pero bou di un kondishon: basta ku bo ta komé na un manera moderá. Pasombra banda di e benefisionan di e fruta "drùif" rasenchi ta kontené tambe hopi suku i kaloria.
Vitamina i anti-oksidante
Benefisionan saludabel di drùif ta ku e ta kontené suku di drùif (òf energia imediato), zür natural, hopi vitamina B i polifenoles ku ta bon pa kurason i ardu. E kaska di drùif ta kontené anti-oksidante (e blou mas ku esun bèrdè), ku ta protehá bo kurpa i ku ta yuda e sirkulashon di sanger.
Nir, digestion i kòlèsteròl
Drùif ta stimulá digestion, loke nos ta alimentá nos mes kuné, i e ta tene nos ambiente interno den balansa. Drùif ta hopi bon tambe pa funshonamentu di nir miéntras ku fibranan den pipita i kaska ta promové tránsito intestinal den bo tripa. Esnan ku tin tripa delikado, lo ta bon pa nan kita e kaska i saka e pipita. Tambe e nivel di kolesteròl lo wòrdu benefisiá dor di e, asina yamá, saponinanan den drùif.
Hopi kaloria
No ta tur kos di e rasenchi ta saludabel. Rasenchi ta kontené un mínimo di 285 kilo di kaloria pa kada 100 gram, lo kual sumamente hopi. Drùif tambe ta un fruta riku na kaloria (72kcal/100g). Esei ta bini siguramente dor dje kantidat di suku ku e ta kontené: intermedio di 15 pa 18 gr pa kada 100 gram, miéntras ku mayoria di otro frutanan ta kontené mas o ménos 12 gram di suku pa kada 100gr. Den rasenchi esei ta 84 gr di suku pa kada 100gr.
Bon pa djente
Apesar di tur kos rasenchi ta keda un pasa boka saludabel, basta ku kome na un manera moderá.
E fibra (5,4gr pero 100gr) ta duna un sensashon dushi i ta laga e tripa traha sin difikultat. Un benefisio mas ta ku rasenchi ta un amigu di nos djentenan, apesar dje suku ku e ta kontené. E ta kontené supstansianan ku ta mata bakteria i asina kombatí plaka na djente.
BENEFISIONAN DI
rASENCHI