NOTISIA
Dia 20 di novèmber 2014 Fundashon pa Konsumidó huntu ku e federashon di kompanianan di seguro, Curaçao & Bonaire Insurance Association, a firma a reglamento di e komishon di disputa di seguronan i e akuerdo ku e promé tres miembronan di e komishon di disputa.
Despues di algun aña trahando duru pa konhuntamente ku Curaçao & Bonaire Insurance Association establesé un komishon di disputá pa kasonan di konsumidónan kontra nan kompanianan di seguro, nos tin honor pa informá pueblo di Kòrsou ku e komishon di disputa awor ta un realidat. Dia 20 di novèmber 2014 Fundashon pa Konsumidó huntu ku Curaçao & Bonaire Insurance Association a firma e reglamento di e komishon di desputa di seguronan di Kòrsou. E komishon aki lo kuminsá ehersé su funshon komo instansia ku ta regla disputanan entre konsumidónan i nan kompanianan di seguro entrante 27 di novèmber 2014. Tambe a firma e kontrato individual ku e promé 3 miembronan di e komishon di disputa, kual ta: dr. mr. Peter Klik, mr. Fleurella Olaria i sr. Fred Hoeben.
Komienso aña 2012
E idea pa lanta un komishon di disputa ku ta duna un veredikto den kasonan di konsumidónan kontra nan kompania di seguro a kuminsá na aña 2012. A traha komo promé ophetivo un kódigo di kondukta ku mayoria kompanianan di seguro na aña 2013 a bai di akuerdo kuné. Na aña 2013 tambe Fundashon pa Konsumidó a sera un akuerdo formal ku Curaçao & Bonaire Insurance Association pa traha huntu pa lanta un komishon di disputa di seguronan di Kòrsou. A hasi lo máksimo pa finalisá e establesimentu di e komishon di disputa aki mas pronto posibel komo ku a mira e nesesidat den komunidat pa un komishon di disputa ku por duna un veredikto den kaso entre e konsumidó i su kompania di seguro na un preis abou i den un término kòrtiku.
Ken lo por hasi uso di e prosedura aki?
Tur konsumidó lo por entregá un petishon pa resolvé un disputa ku nan kompania di seguro. E konsumidó por haña un formulario pa yena na Fundashon pa Konsumidó pa asina ei entregá su keho na e komishon di disputa aki. Si ta asina ku tin algun kondishon ku e konsumidó mester tene su mes na dje pa e komishon di disputa por trata su kaso.
Na promé lugá e persona mester a pasa e prosedura di keho di su mes kompania di seguro. Ta asina for di aña 2013 e kompanianan di seguro, segun e Kódigo di Kondukta, mester tin un prosedura interno di keho pa atendé ku kehonan di nan kliente. Si e konsumidó tin un keho e mester entregá su keho na su kompania di seguro pa asin’ei e pasa e prosedura di keho interno. Si e konsumidó no ta di akuerdo ku resultado di e prosedura di keho di su kompania òf si despues di 6 siman di a entregá su keho ainda e no a risibí kontesta, e konsumidó por pasa Fundashon pa Konsumidó pa entregá un keho. Na momentu ku e konsumidó entregá su keho na Fundashon pa Konsumidó, Fundashon pa Konsumidó lo purba intermediá entre e konsumidó i e kompania di seguro. Si intermediashon tampoko no trese un resultado, e konsumidó por hasi un petishon pa trata su keho na e komishon di disputa.