Hopi ta komersiantenan ku ta kere ku nan tin e opshon pa bende nan produkto òf servisionan na preisnan ku òf sin OB. Den nos edishon di luna pasá kaba nos a pone atenshon ekstenso na e tópiko aki, splikando nos konsumidónan ku ta ilegal pa un negoshi bende kualke produkto na un preis sin hinka e porsentahe válido di OB den e preis.
Despues di nos publikashon Fundashon pa Konsumidó a risibí vários keho i reklamo di negoshinan ku ainda tin e oudasia di kobra OB apart i hasta pone bòrchi nan porta atvertiendo ku tur preis ta sin OB. Un akto ku ta kontra di lei i ku mester keda kontrolá di un manera mas riguroso di parti di instansianan di gobièrnu.
E motibu prinsipal pa a hasi obligatorio pa tur preis di konsumidó ta inkluso OB ta pa protehá nos konsumidónan. Ya ku tin diferente porsentahe di OB válido pa diferente produkto, ta fásil pa un bendedó kobra un konsumidó un porsentahe muchu haltu nan momentu ku e bai paga loke e kumpra na kaha. Hopi ta e señalnan ku nos ta haña di konsumidónan ku ta haña nan ta reklamá na momentu ku nan kaha e komersiante ta kobra OB riba produktonan ku tin 0% di OB riba nan.
Fundashon pa Konsumidó lo bai dirigí un karta na Minister di Finansa, ku ta e mandatario responsabel pa kòntròl riba leinan fiskal, pa urgí pa bini ku kòntròl transparente i desidido i sanshoná komersiantenan ku ta violá leinan i ta kere ku ta nan ta dikta manera transakshonnan ta keda hasí riba nos isla.
Banda di esaki nos lo bai kuminsá un kampaña pa konsientisá nos konsumidónan pa evitá di kumpra nan tur negoshi ku ta violá leinan di OB i ta pretendé ku ta nan ta stipulá reglanan vigente den nos komunidat.
PRÓLOGO
Direktor
Marc Marshall
preisnan sin OB