Promé bo kumpra,chèk
mi mester di un smart tv?
Ya pa basta aña tur televishon a bira flètskrin. Sea ta Plasma, LCD òf LED. E manera tradishonal di wak kontenido riba bo televishon ta sea via di un antena pa risibí e señal for di airu (Telecuracao, CBA i algun kanal Venezolano) òf via un bòks di un provedó di kabel, sea ta TDS, Direct TV, Flow òf Tres. Banda di esaki tambe nos por konektá un DVD of Blueray player pa asina disfrutá di un pelíkula na kas.
Últimamente e asina yamá Smart TV a keda introdusí riba merkado. Esaki ta un televishon ku por konektá ku internet i ku tin sierto aplikashonnan instalá riba dje. E manera di konektá e televishon riba internet ta sea via di un waya di nètwèrk òf via di Wifi. Kada aplikashon riba e Smart TV tin un funshon. Algun di esunnan mas konosí ta Netflix, CNN i Hulu+. Pero tambe aplikashonnan manera Facebook i Youtube bo por risibí riba un Smart TV. Algun aplikashon ta rekerí un abono i tin otro ta dunabo kontenido grátis. Tur e aplikashonnan aki ta kai bou di e grupo di Video On Demand (VOD), Esta e kontenido ta disponibel pa wak ora abo ke.
E manera pa haña akseso na e aplikashonnan aki riba bo televishon ta, dor di kumpra un smart TV. Si bo no ke hasi esaki, tin un alternativa pa bo. Tin vários aparato òf asesorio disponibel riba merkado ku bo por konektá riba bo flètskrin tradishonal.
Apple TV
Un Apple TV ta un aparato chikí ku ta konektá riba bo televishon na un banda i riba bo konekshon di internèt na otro banda. Riba e aparato aki tin un kantidat di aplikashon, meskos ku tin riba un Smart TV. Tambe bo por hür video via di e aparato aki sin mester sali bo kas. Si bo tin otro aparato di Apple sierto kontenido i / of aplikashon por wòrdu interkambiá entre e aparatonan aki. For di bo Ipad òf Iphone bo por pasa bo skrin riba bo TV via di e Apple TV. Esaki yama Airplay. Pues lo bo por show bo potrètnan òf un video di Youtube for di riba bo Ipad dirèkt riba bo TV via di e Apple TV.
Chromecast
Chromecast ta un aparato chikí ku ta wòrdu traha dor di Google. E ta konektá dirèkt riba un konekshon HDMI di bo TV. Tin aplikashon riba bo tèblet òf telefon ku por pasa e kontenido dirèkt riba bo TV via di bo Chromecast.
Un diferensha entre “airplay” di Apple i e chromecast ta ku esun último aki no mester di e tèblet òf telefon mas despues ku bo a “cast” bo skrin pa e TV. E Chromecast ta sigui tuma e kontenido direktamente for di internèt.
Tambe tin aplikashonnan riba bo PC of lèptop ku por “cast” riba bo TV. Por ehèmpel, Chrome (e browser di Google) tin un add-in ku ta lagabo show bo skrin riba bo TV.
Kontrali na Apple su solushon, esun di Google ta maráa na e aplikashon individual.
Roku
Roku tambe ta traha algun aparato ku ta similar na e Apple TV. E aparato aki tambe tin vários aplikashon pòrnada i tambe algun ku mester paga un abono mensual.
KOMPARÁ I KUMPRA