De e kaso ku banko a rechasá bo petishon pa finansiamentu esei ke men ku bo ta mará na un kompra ku bo no por paga. Anto esaki por tin konsekuensianan basta ferfelu.
Sierto makelar den nan kontrakt ta stipulá ku den kaso bo disolvé e akuerdo di kompra, bo tin ku paga un sierto montante na but. E but aki por ta un suma konsiderabel manera un porsentahe di 10% di e preis di benta. Aki ta sigui un ehèmpel pa asin’ei duna bo un bista den ki situashon ferfelu bo por haña bo.
Bo a wak un kas ku bo a gusta mashá, nèt den e bario kaminda semper bo ker a biba. E preis di e kas ta
fl. 200.000,-. Mesora bo a bira enkantá ku e kas. Komo ku bo no tin un trabou ku ta paga malu bo ta di opinion ku banko lo bai di akuerdo pa finansiá kompra di e kas di bo soño. Bo ta firma djabièrnè un kontrakt ku e makelar i djaluna bo ta bai banko pa hasi un petishon pa finansiamentu ku e kontrakt firmá. Bo ta entregá tur bo papelnan na banko i ta tende di banko ku nan lo evaluá bo petishon i ku
denter di 2 siman lo bo haña kontesta. Dos siman despues bo ta haña kontesta di banko: bo petishon ta wòrdu rechasá komo ku banko ta di opinion ku tin muchu riesgo mará na e finansiamentu.
Sinembargo bo a firma e kontrakt ku e makelar pa kompra di e kas di fl. 200.000,-.
Bo ta aserká e makelar ku e notisia ku bo no por kumpra e kas mas paso banko a nenga di duna bo finansiamentu. E makelar ta mustra bo e or’ei den e kontrakt kaminda tin stipulá ku si bo disolvé e kontrakt, bo tin ku paga nan 10% di e preis di e kas. 10% di fl. 200.000,- ta fl. 20.000,- na but. Di unda bo ta saka fl. 20.000,- pa paga e makelar? Un situashon ferfelu sigur! Kon mi por evitá di kai den e situashon ariba menshoná?
No firma niun kontrakt pa kumpra e kas sin ku den e kontrakt tin un ‘financieringsvoorbehoud’. Un ‘financieringsvoorbehoud’ ta un klóusula den e kontrakt ku ta duna abo komo kumpradó e derechi pa disolvé e akuerdo di kompra si bo no haña finansiamentu. Tene na kuenta si ku abo komo e kumpradó tin un obligashon pa hasi bo máksimo esfuerso pa haña finansiamentu. Pues no apliká na 1 (un) òf 2 (dos) banko so pa finansiamentu pa kompra di bo kas. Den sierto kondishonnan na Hulanda tin stipulá ku e kumpradó mester a hasi un petishon pa finansiamentu na un mínimo di tres (3) diferente banko. Na Kòrsou sigur e merkado ta mas chikí pero hasi bo bèst.
Sòru tambe ku den e kontrakt tin un klóusula di tempu akseptabel poné den kual bo por hasi un apelashon riba e ‘financieringsvoorbehoud’. Buska informashon pa wak kuantu tempu bankonan normalmente ta tuma pa evaluá un petishon pa finansiamentu i sòru pa e término no ta unu muchu kòrtiku manera djis un (1) siman. Pues sòru pa e término ta un término real i posibel pa ku evaluashon di bo petishon pa finansiamentu.
Den e klóusula aki den e kontrakt hopi biaha tin formulá kon bo mester hasi un apelashon riba e ‘financieringsvoorbehoud’. Kòrda semper pa kumpli ku e kondishonnan stipulá den e klóusula di bo kontrakt i ora bo ta hasi algu, hasié riba papel ya bo tin prueba.
Di nos banda nos ta spera ku e informashon aki ta útil pa bo i lo yuda bo den búskeda pa bo propio kas.