DERECHI I DEBER
KOMPRA DI UN KAS ÒF TERENO
Mirando ku preisnan di hür di kas subiendo, no ta algu straño ku hopi di nos ta konsiderando pa kumpra òf (laga) traha un kas. Kompra di un kas por ta algu sumamente bentahoso. Kòrda riba tur e añanan ku bo a paga hür sin ku nunka e kas ta bira di bo anto lo bo komprondé dikon. Pues ta bon pa bo ta na altura ku lei ta duna sierto reglanan spesífiko pa kompra di un kas òf tereno.
Na promé lugá lei, artíkulo 1 di Buki 7 di nos Kódigo Sivil, ta definí kompra komo e areglo kaminda un partido ta mara su mes pa duna e otro partido algu i e otro partido na su turno ta mara su mes pa paga un preis den sèn pa esaki. Pues e areglo ku bo a yega ku bo konosí pa ‘bende’ bo outo en kambio pa su outo, no ta un areglo di kompra segun nos Kódigo Sivil.
Por eskrito
Kompra di un kas òf tereno semper mester sosodé por eskrito segun artíkulo 7:2 insiso 1 di nos Kódigo Sivil. Miéntras tin un areglo entre partidonan pa kompra di un kas òf tereno pero no tin nada riba papel, e partidonan por kibra e areglo. No ta e persona ku ta kumpra e kas òf tereno so por kibra e akuerdo pero e bendedó tambe. Lei ta papia pues ku e akuerdo ta ‘vernietigbaar’. Un apoderashon pa bende òf kumpra un kas òf tereno tambe, mester sosodé por eskrito.
Entrega di akta na man
(artíkulo 7:2 insiso 2 Kódigo Sivil)
Si bo ta kumpra un kas ku e intenshon pa hasi uso di dje (parti di dje) komo bibienda anto bo no ta aktuando den funshon di bo trabou òf negoshi, e or’ei tin ku entregá bo e akta òf un kopia di e akta di
kompra na man. E bendedó por pidi bo si pa bo dun’é un komprobante fechá na su turno.
Disolvé kompra denter di 3 dia
Despues ku bo a haña e akta di kompra den bo man, bo tin segun artíkulo 7:2 insiso 2 di nos Kódigo Sivil tres (3) dia pa disolvé e kompra. Esaki no ta konta si a entregá bo e kas kaba. Pues lei ta duna bo tres (3) dia pa sali for di e akuerdo di kompra despues ku bo a firma i a risibí e akta. Den e tres (3) dianan aki bo por disolvé e akuerdo di kompra sin duna rason òf gastu.
Pa loke ta trata e término di tres (3) dia nos tin ku remarká ku e ta un término hopi kòrtiku. Si nos wak e situashon den práktika di mayoria persona ku ke kumpra un kas, hopi biaha mester di finansiamentu pa hasi kompra di e kas posibel. Un petishon pa finansiamentu ta tuma hopi biaha mas ku tres (3) dia pa keda tratá. Esei ku tur probabilidat ta nifiká ku e término pa bo disolvé e akuerdo di kompra, ku ta tres (3) dia, mayoria biaha a pasa kaba ora bo haña un kontesta di banko pa ku finansiamentu di e kompra.