E ultimo lunanan nos a tende den notisia di diferente artistanan ku a bira viktima di ‘hacking’. E personanan ku a ‘hack’ e ‘account’ di e artistanan aki a haña akseso na potrètnan eksplísito ku e artistanan mes a manda via nan ‘smartphone’. Hopi di e potrètnan aki a keda publiká online. E luna aki atrobe tin notisia tokante ‘hacking’. E biaha aki ta un aplikashon a wòrdu di hack ku konsekuensia ku e ‘hackernan’ a haña míles di potrèt den man; hopi di e potrènnan ta eksplísito.
NOTISIA
Potrètnan eksplísito, ku personanan a manda usando e servisio di manda mensahe ‘Snapchat’, aparentemente a wòrdu publiká online. E hackernan a atvertí ku lo bai pone mas di e potrètnan aki online.
Imagennan ku e usuarionan a manda via Snapchat’, hasiendo uso di un otro app (terser partido), i no e app mes di Snapchat, a keda interseptá. Komo ku mitar di e usuarionan di Snapchat ta usuarionan entre 13 i 17 aña di edat, tin preokupashon ku hopi di e potrènan aki ta di muchanan. Snapchat a laga sa ku su servernan no a wòrdu di hack.
Snapchat mes a añadí: “Usuarionan di Snapchat a bira viktima komo ku nan a usa e servisio di Snapchat di manda i risibí ‘Snaps’ pa medio di un otro app, terser partido, i no esun ofishal di Snapchat. Un práktika ku Snapchat ta prohibí den su kondishonnan general pasobra nan ta komprometé seguridat di e usuario. Nos ta vigilá i monitoriá App Store i Google Play pa aplikashonnan illegal di terser partidonan i tabatin eksito den saka hopi di nan for di App Store i Google Play.”
Sinembargo, investigadonan di seguridat a bisa ku Snapchat tin ku tuma mas responsabilidat pa ku informashonnan di usuarionan.
‘Pa nan djis sinta bisa ku ta falta di e usuario, ta zona un tiki ekstremo’, Mark James, un speshalistá riba e tereno di seguridat di ESET, a bisa. ‘Nan ta duna e impreshon ku e ta safe. Nan tin ku stòp otro personanan su abilidat pa aksesá nan datonan.’
Entre tantu e hackernan a menasá ku nan lo publiká míles mas di e imagennan aki riba internet.
Insidente di preokupashon
Snapchat ta un app pa manda mensahe ku ta brinda su usuarionan e posibilidat pa kompartí imágen- i videonan ku ta “disparsé” despues di un tempu kòrtiku, normalmente despues di algun sekonde.