PRÓLOGO
Bon biní na un edishon nobo di Konsumidó Alertá Digital. Un di mi metanan prinsipal ku mi a stipulá pa mi mes asina mi tabatin e honor di bira direktor di nos fundashon tabata pa hasi mi máksimo esfuerso pa den mi periodo Kòrsou por yega na un Outoridat di Konsumidó.
Un Outoridat di Konsumidó ta den práktika un órgano outónomo, sin influensha direkto di polítika, ku meta prinsipal pa imponé leinan ku ta protehá nos konsumidónan riba komersiantenan ku, intenshonalmente òf no, ta violá. Nos Kódigo Sivil ya ta disponé di hopi artíkulonan ku leinan ku ta protehá nos na momento di kumpra un produkto òf servisio. Pero si un komersiante violá esaki, ken ta protehá nos, duna sanshonnan i sòru pa hechonan asina no bolbe ripití?
Hopi ta kere ku Fundashon pa Konsumidó tin e outoridat. Pero esaki ta un impreshon eróneo ku hopi biaha tambe ta biba den prensa i otro medionan di komunikashon, dunando komunidat tin biaha informashon robes. Manera mi sa splika mas biaha, Fundashon pa Konsumidó su ròl ta esun di e abogado di e konsumidó. Esun ku ta konseh’é, konsientis’é, dun’é informashon verídiko pa e konsumidó sa kon e defendé su mes i tambe kua ta su derechinan apesar di loke un komersiante por bisa. Nos ta bringa e bataya di e konsumidó manera un bon abogado lo hasi. Pero hues nos no ta. Esei lo no ta bon tampoko. Bo no por sinta riba e stul di abogado i di hues na mes momentu.
Na kasi tur pais na mundu tin, banda di e organisashon pa konsumidó un organisashon ku tin komo tarea stipulá, kontrolá i, sanshoná violashonnan di, reglanan entre komersio i konsumidó. E outoridat di kompetensha ta e organisashon imparsial entre e konsumidó, representá pa nos fundashon, i e komersiante, na momentu ku tin un disputa tokante un produkto òf servisio ku e keda bendé. E ta e hues.
Un Outoridat di Konsumidó tin outoridat pa kontrolá violashonnan manera entre otro propaganda i deskuentonan engañoso, preisnan eksesivo, akuerdonan entre komersiantenan pa repartí merkado, afspraknan tokante preis, akuerdonan di eksklusividat di benta di produkto i servisio i restrikshon di akseso di merkado di otro kompetidónan. E Outoridat ta stipulá reglanan konkreto i tin hèrmèntnan ankrá den lei pa sanshoná violashonnan ku keda denunsiá i keda komprobá.
Gobièrnu di Kòrsou a kuminsá e aña aki ku e trayekto pa yega na un Outoridat di Konsumidó. Fundashon pa Konsumidó ta aploudí esaki. Di nos parti nos lo duna nos aporte pa e órgano aki bira unu sólido i ku un base amplio pa por ehersé su trabou di un forma mas efisiente i efektivo posibel.
Direktor
Outoridat di Konsumidó
Marc Marshall
Editorial