Diferente ta e kehonan ku Fundashon pa Konsumidó ta risibí di konsumidónan reklamando ku kompanianan di kabel ta dunando un periodo hopi kòrtiku pa paga nan resibu di luna. Tres i Flow respektivamente ta duna nan klientenan 3 te 1 dia den e luna nobo pa paga nan resibu nobo. Asina mes, pa e kompanianan aki si bo no paga promé ku e promé òf di tres dia di e siguiente luna bo konekshon di internèt i televishon ta keda deskonektá.
Base di esaki ta ku e kompanianan ta bisa di a kambia nan kondishonnan general den kua nan ta stipulá ki dia un resibu ta kaduká. Un práktika no hopi na fabor e kliente sigur mirando ku e maneho di tur dos e kompanianan ta pa kobrabo di adelantá. Banda di esaki tambe bo mester paga un suma konsiderabel na bòrg.
Pues, un kliente ku ta kobra e último dia di luna lo no por paga su kuenta na tempu sigur si e último dia di luna ta kai den wikènt. E suma ku e kompanianan en kuestion ta kobra nan klientenan na but ta konsiderabel i hasta tin biaha fuera di proporshon. Tres, por ehèmpel, ta kobra un montante di no ménos ku 45 florin pa rekonektá un kliente ku paga despues di dia tres.
Banda di e hecho ku e tèrmino ku e kompanianan aki ta dunando nan klientenan ta demasiado kòrtiku, siendo ku nan no tin niun klase di rísiko mirando ku nan ta kobrando bo adelantá i no despues di e periodo, manera bo ta paga bo kuenta di por ehèmpel Aqualectra, nos mester remarká lo siguiente.
Manera nos a bin ta splika ya pa algun tempu kaba, kompanianan ku ta kere ku nan por kambia nan kondishonnan di benta di produkto- i servisionan mester tene nan mes na loke lei ta preskribí.
Kompanianan semper mester anunsiá adelantá si nan ke kambia partinan esensial di un kontrakt. Un tèrmino di 3 luna lo ta konsiderabel. E anunsio aki mester ta por eskrito i mester duna e kliente e opshon i posibilidat pa terminá su kontrakt, dado kaso e no ta bai di akuerdo ku e kondishonnan nobo. Esaki tambe ta konta na momentu ku kambia por ehèmpel spit di internèt òf preis di e servisio ku bo a kumpra. Ni maske kiko un kompania pone den su kondishonnan general ku lo por kontradisí esaki.
Konsumidónan ku no ta di akuerdo ku loke un kompania kambia den su kondishonnan di benta mester semper hasi reklamo di esaki por eskrito (por via mail) na e kompania. Si bo no por yega na un kompromiso ku e kompania, kòrda ku bo tin e derechi pa kanselá e kontrakt i buska un otro kompania ku por dunabo un mihó servisio òf kondishonnan di benta. Pa kualke konseho por tuma kontakto ku Fundashon pa Konsumidó.
Finalisando nos ke keda kòrda nos konsumidónan di ta krítiko na momento di kumpra. Preis, spit, konekshon, pero tambe kondishonnan di benta i di pago ta puntonan krusial pa tene kuenta kuné ora sera un kontrakt ku kualke kompania. Kompará semper bon promé ku kumpra.
Promé bo kumpra,chèk