E diferensha entre tèblet i telefon ta birando dia pa dia mas chikí. Ta sali vershonnan di tèblet nobo mas chikí i vershonnan di telefon mas grandi. Ta bon pa pensa si bo mester di un tèblet òf si un telefon grandi mes lo sirbi bo propósito. Si bo drenta un pakus sin pensa bon riba loke bo mester òf ke, lo bo por keda hopi konfundí dor di e gran surtido ku tin.
E siguiente preguntanan bo por uza komo guia.
Apple, Android òf Windows?
Si bo ta uzando un di e tres sistemanan ariba menshoná kaba pa bo telefon òf kòmpiuter ta mas fásil pa sigui uza esaki. Mayoria app òf sòftwèr por wòrdu uzá atrobe riba bo aparato nobo i ta mas fásil pa sinkronisá bo datonan entre e diferente aparatonan. Por ehèmpel, pa Apple bo por sinkronisá bo kontaktonan òf agènda. Tambe e sistema di papia ku e telefon ku yama Siri ta meskos riba telefon, tèblet i tambe e Operating System di e kòmpiuternan.
Na Google bo ta haña e mesun situashon ku kontaktonan, agènda i tambe “Google Now”. Windows tin e mesun situashon ku nan “cortana”. Pa ku Windows nan a hasi e “look and feel” di Windows 8 riba telefon i tèblet meskos. Si nada di esaki ta importábo, ta interesante pa sa e diferensha entre e vários “Operating Systems”. Android i Windows ta mas flèksibel ku Apple. Dor ku vários kompania ta traha telefon I tèblet ku Android I Windows instalá riba dje, nan kada unu ta traha un vershon un tiki diferente. Wak por ehèmpel e diferensha entre un Samsung i un Google Nexus telefon òf tèblet. Tur dos tin Android pero nan ta mustra kompletamente diferente.
Dor ku Apple so ta traha nan produkto, tur tin e mesun “look and feel”. Bo no por hasi kambio na esaki.
Hopi aparato ku Android I Windows tin un memory card òf un USB port. Esaki lo bo no haña riba un Apple.
Grandi òf chikí?
Hopi tèblet ta bin den vários tamayo. Tin vershonnan di 7, 9 òf 10 inch. Tin di 8 inch tambe. Si bo tin pensa di saka portrèt ku e tèblet, pensa riba un tamaño mas chikí. Si bo tin idea di lesa buki òf revista riba dje, un tamaño mas grandi ta mas konfortabel.
Tin tamaño mas grandi tambe. Microsoft Surface Pro 3 tin un skrin di 12 inch. Hopi biaha mas grandi e tèblet, mas pisa esaki ta bira. Ora di lesa buki òf revista e no ta konfortabel.
Bo ta pensando pa kumpra un tèblet?