Konsumidó Alertá Volumen 10, sèptèmber 2014 | Page 13

Uso komersial di bo datonan personal

Un kompania, a base di artíkulo 8 di e Lei di protekshon di datonan personal, por solamente usa bo datonan personal si:

- abo a duna outorisashon pa esaki;

- esaki ta nesesario pa e kompania por kumpli ku

su obligashonnan ku e tin pa ku bo, a base di un

kontrakt entre abo kuné;

- pa tuma medidanan pa por sera un kontrakt ku

bo a base di un petishon ku abo a hasi;

- pa asina e kompania por kumpli ku un obligashon

a base di lei ku ta konta p’e;

- e uso di bo datonan personal ta nesesario pa un

órgano di gobernashon por kumpli debidamente

ku su trabou;

- uso di bo datonan personal ta nesesario pa sòru

pa interes hustu di e kompania òf un terser

partido na kua e datonan ta wòrdu duná, ku

eksepshon ku e kaso kaminda un derechi

fundamental di e persona, primeramente e derechi riba protekshon di ambiente personal, mester prevalesé.

Datonan personal segun artíkulo 9 di e Lei di protekshon di datonan personal, no tin mag di wòrdu usá na un manera ku ta inkompatibel ku e ophetivo pa kua a tuma e datonan.

Pues un kompania por usa mi datonan personal pa motibunan komersial manera den e kaso di manda propaganda?

Segun e Memorie van Toelichting e kompania por lo general por usa bo datonan personal pa manda propaganda pa produkto- òf servisionan ku ta mesun kos òf paresido na produkto – òf servisionan ku e personanan ta hasi uso di dje kaba na e kompania. Pues, den sierto sirkunstansia e kompania por usa bo datonan pa manda bo propaganda di nan produkto- òf servisionan.

Pa evitá ku ta bai drenta den un diskushon ku si e kompania tabatin un interes hustifiká pa manda bo propaganda òf no, lei ta duna un hèrmènt pa pone un paro na e uso di bo datonan personal pa metanan komersial.

Si un kompania òf un terser partido ta hasi uso di bo datonan personal pa drenta den òf mantené un relashon personal ku bo, ku e intenshon di usa e relashon aki pa haña sèn pa un fin komersial òf di karidat, abo semper tin e derechi di oponé bo mes na esaki (verzet aantekenen) segun artíkulo 33 insiso 1 di e Lei di protekshon di datonan personal. Na momento ku bo hasi un apelashon riba bo derechi di oposishon, e kompania mester tuma medida pa stòp mesora di usa bo datonan personal na e forma ei segun artíkulo 33 insiso 2 di e Lei di protekshon di bo datonan personal.

Esaki ta nifiká ku den kaso ku bo ke pa e kompania stòp di manda bo propaganda via sms, bo mester oponé bo mes na e uso di e forma ei di bo datonan personal. Manda e kompania un karta den kua bo ta duna di konosé ku bo ta hasi uso di bo derechi pa oponé bo mes na e manera ku e kompania ta usa bo datonan personal, pues pa mandabo propaganda, i ku e mester stòp di mandabo propaganda via sms mesora. E kompania mester kumpli ku esaki!

Derechi pa oponé uso di bo datonan personal pa metanan komersial