'OVER- USAGE'
Akseso limitá
Un kliente ku kumpra un pakete di 4G no ta paga pa akseso ilimitá na e ret di internèt. Mayoria pakete 4G ta inkluí un kantidat limitá di data ku e kliente por hasi uso di dje. Si e kliente usa mas ku e kantidat di data inkluí den su pakete, UTS ta kobr’é pa kada MB ku surpasá e límite di data den su pakete. E uso èkstra di data nos ta yama ‘over-usage’. E suma ku e kliente tin ku paga na ‘over-usage’ por ta konsiderabel dependiendo kon intensivo e kliente a usa e 4G internèt.
Den e kasonan ku Fundashon pa Konsumidó a risibí, e suma mas haltu ku a kobra un konsumidó na ‘over-usage’ den un luna di uso tabata aproksimadamente fl. 9000,-. Pues nos ta papiando di míles di florin di debe ku e konsumidó no konsiente por hañ’é konfrontá kuné.
Loke ta hasi e paketenan aki tambe difísil pa manehá ta ku un konsumidó no sa kuantu data un akshon riba internèt ta usa i konsekuentemente ki ora el a surpasá su límite di data. El a risibí un mensahe riba Facebook, kuantu data e akshon aki a usa? El a risibí un mail ku un attachment, kuantu data e konsumidó ta usa ora e habri e mail i attachment? Pues e konsumidó no por midi kuantu data el a usa te ora e hañ’é konfrontá ku e resibu fin di luna. Sigur si bo tin 4G i bo ta mará na uso di un sierto límite di data, no bai stream video pa loko online paso e aktividat aki ta hasi uso di hopi data. Promé ku bo sa bo a pasa bo límite.
UTS ta na altura di e diferente kasonan ku Fundashon pa Konsumidó a risibí en konekshon ku fakturanan eksorbitante pa motibu di ‘over-usage’. Na komienso di aprel UTS a tene un konferensha di prensa kaminda a primintí ku tur kliente ku ta debe UTS montantenan haltu pa motibu di ‘over-usage’ lo tin ku paga te na e máksimo di fl. 2344,-. Loke surpasá e montante aki na e debe lo a keda apsolbé. Sinembargo UTS no a kumpli ku lokual el a primintí. E debenan no a wòrdu apsolbé i pa e konsumidónan ku a haña nan mes konfrontá ku sumanan di míles na over-usage, ainda no tin solushon.
Un yamada ta bai na tur konsumidó pa tene kuidou ora ta buska e paketenan di internèt 4G. Pues bo ta mará na un límite di data i si bo pasa bo límite, bo por haña bo ku un resibu na fin di luna pa un suma di míles di florin. E paketenan aki sigur no ta adekuá pa bo bai stream pelíkula i programa di televishon online ku nan. Si bo gusta stream pelíkula òf programanan di televishon, buska un konekshon ADSL òf hasi uso di wifi.
PROBLEMA DI
For di final di aña 2012, Fundashon pa Konsumidó a bin ta risibí vários keho di klientenan di UTS ku a haña nan konfrontá ku kuentanan eksorbitante di internèt. E klientenan aki a sera kontraktnan ku UTS pa asina risibí internèt 4G. UTS ta ofresé diferente pakete di internèt 4G pa tèblet, lèptòp i tambe telefòn selular. Ku e internèt 4G e kliente no ta mará na un lokalidat fiho manera ta e kaso ku internèt ADSL. Tur kaminda ku e persona bai, e ta disponé di internèt.
?