AKTUALIDAT
KEN TA RACHID PIETERSZ?
Rachid ta un hóben di 23 aña, hopi ‘chill’ , sosial i rilèks. Banda di esaki mi ta un persona hopi ‘Jolly’ i semper bai ku un ‘smile’ di orea pa orea. Apesar di ta un hóben ketu mi sa wòrdu karakterisá komo e payaso mayó den mi grupo di amistatnan.
Na chikí mi a bai A.E. Goilo School, siguí pa Maria College i despues mi a bishita Frater Aurelio SBO. Aki mi a hasi e estudio di ‘commercieel medewerker Bank- en Verzekeringswezen Niveau 4’ . Ora mi a terminá mi estudio na Frater Aurelio SBO mi a sinti ku mi no tabata kla ainda pa kuminsá laborá. Pa e motibu aki mi a skohe bai hasi e estudio di 'Communicatie’ na Hulanda. Aktualmente mi tin 3 aña na Hulanda.
KOMBERSANDO KU RACHID PIETERSZ, STUDIANTE DI HBO- KOMUNIKASHON I STAZJÈR NA FUNDASHON PA KONSUMIDÓ
UN PLAN DI
KOMUNIKASHON AGRESIVO
PA KAPTA E KONSUMIDÓ
DIKON BO A SKOHE PA KORE STAZJE NA KÒRSOU I DIKON FUNDASHON PA KONSUMIDÓ?
Pa mi ta sinsero, un faktor ku sigur a hunga un ròl grandi pa ku e desishon aki ta ‘heimwee’. E gana di ta rondoná di mi famia , amigunan i sernan kerí. E otro motibu ta ku na momentu ku mi kaba ku mi estudio lo mi ke bin bèk i duna mi aporte i eksperensia na mi pais Kòrsou. Dikon mi a skohe pa kore stazje na Fundashon pa Konsumidó? Wèl, esaki no tabata un desishon fásil debí ku mi tabata tin e posibilidat di por a skohe entre mas kompania/organisashonnan na Kòrsou. Loke a atraémi di Fundashon pa Konsumidó ta ku pa e organisashon aki, e konsumidó semper ta sentral, kual pa ami ta algu hopi importante. Mi ta kere ku konsumidónan mester ta konsiente di nan derechi i debernan pa asina nan por aktua responsabel i ta alerta di peligernan ku nan por haña nan mes aden, kumprando un produkto òf hasiendo uso di un servisio. Eseinan tabata mi motivashon pa forma parti di e organisashon aki pa asina yuda krea mas konsumidó konsiente riba nos pais.
KIKO TA BO TAREA DURANTE DI BO STAZJE?
Aktualmente mi ta sòru pa e parti di komunikashon eksterno di Fundashon pa Konsumidó. Mi proyekto spesifikó ta enserá implementashon di un plan di komunikashon mas agresivo i ambisioso pa krea mas oportunidat i publisidat pa Fundashon pa Konsumidó. Entre otro mi ta trahando riba e introdukshon di un revista digital ku ta kuadra ku e tempu modèrno di komunikashon virtual. Otro proyektonan ku mi ta opuká ku ne ta:
- organisá un anochi di entrega di sertifikado
- traha un propuesta pa un konferensia ku tin ku tuma luga den 2014
- implementá un kampaña di promoshon
RIBA KUA TERENO FUNDASHON PA KONSUMIDÓ TA DESTAKÁ MAS SEGUN ABO?
Pa ami Fundashon pa Konsumidó ta resaltá den e aerea di duna informashon balioso pa e konsumidó, intermediá entre konsumido i komersiante na moemto di un keho, duna e konsumidó konseho i yudansa hurídiko i hasi investigashon di preisnan di produkto i servisio riba merkado.
KUA TA E EKPERIENSIA DI MAS GREAT DURANTE DI BO STAZJE NA FPK?
E eksperensia di mas great den e dos lunanan aki ta ku mi mes por bini ku tópikonan interesante pa e konsumidó i transforma esakinan den artíkulonan pa e revista digital. Algu mas ku mi ta haña hopi great ta e echo ku aktualmente mi ta organisando un evento i ku mi tin e oportunidat di siña i pone diferente kosnan ku mi a siña na skol den praktiká .
KU KUA BESTIA OF ARTISTA LO BO ASOSIÁ FPK KUNE I DIKON?
Hahahahahahahaha…Ammmmm..Lagami pensa…Bon pregunta! Ami lo asosiá Fundashon pa Konsumidó ku mi kantante faborito: Jessie J. Esaki pa motibu ku Jessie J ta un artista ku mayoria hende no tabata konosé den pasado. E tabata kanta por ehèmpel den metro òf pa un públiko chikitu, pero tiki tiki su popularidat a krese i awe e ta un di e artistanan di mas famoso na mundu. Fundashon pa Konsumidó ta un fundashon ku for di 1975 ta sali na defensa i interes di konsumidónan di Kòrsou. Ku añanan Fundashon a sigui krese i bira un partner respetá pa tantu gobièrnu komo komèrsio.
KIKO TA BO VISHON PA FPK?
Mi ta mira Fundashon pa Konsumidó aki un par di aña komo un instituto ku ta brinda e konsumidó e fasilidat pa yega na informashon aktualisá i verídiko pa medio di djis un "click" via nan smartphone, lèptòp of tèblet. Pero mas ku tur kos, un Fundashon independiente ku ta sigui sali na vanguardia di nos konsumidónan. Ku e meta pa hasi nan hòmber i muhénan konsiente di nan derechi i debernan.