Konsumidó Alertá Volumen 24, mart 2016 - Page 8

IMPOSIBEL

Pa por kontestá pregunta di e konsumidó aki nos ta referí na buki 7 di nos Kódigo Sivil, ku ta trata reglanan di kontrakt/kompra spesial, ku por wòrdu kategorisá komo “Consumentenkoop” (artíkulo 7: 5 Kódigo Sivil). Kombiná ku buki 7, buki 6 di nos Kódigo Sivil ta duna reglanan general pa un kontrakt.

Artíkulo 7:26 insiso 1 ku insiso 2 Kódigo Sivil

Na promé instante ora ta trata di kompra di un produkto òf servisio bo ta haña ku e komersiante ta drenta un akuerdo ku un konsumidó pa bende un produkto òf servisio kontra “pago” di e konsumido. E komersiante tin e deber di entregá e produkto òf servisio na e konsumidó. I e konsumidó tin e deber di paga e komersiante pa e produkto òf servisio. Esaki ta wòrdu reglá den artíkulo 7:26 insiso 1 di nos Kódigo Sivil. Den e establesimentu e preis di un produkto ta wòrdu indiká riba un karchi/bòrchi/steker, ya asina e konsumidó sa delantá kuantu e tin ku paga ora e yega kahera.

Pago i entrega pareu

Tambe e artíkulo aki ta indiká den insiso 2 ku e forma di pago i entrega di e produkto ta basá riba e prinsipio di un sistema di “gelijk oversteken”. Esei kier men ku e konsumidó ta paga i ta haña e produkto mesora; pago i entrega ta tuma lugá pareu na e establesimentu.

Pa motibu di esei e pago kompletu ta pasa na mes momentu ku e entrega di e produkto.

Pago despues

Pero tin biaha e pago no ta bai na mes momentu ku e produkto wòrdu entregá na e konsumidó. Por ehèmpel ora kumpra via krédito. Tambe partidonan envolví por palabrá ku e pago por wòrdu hasí ora e produkto/servisio wòrdu entregá.

Pago delantá

Tin kaso kaminda un konsumidó por wòrdu obligá na paga un parti di e preis adelantá. Artíkulo 7:26 insiso 2 di 2 liña di nos Kódigo Sivil, ta indiká ku si ta trata di un “consumentenkoop” un konsumidó por wòrdu obligá na paga no mas ku (hoogstens) 50 % di e preis adelantá. Pero dependé di e produkto/servisio den kada kaso partikular por buta ku un konsumidó tin ku paga mas ku mitar òf hasta tin bia e preis kompletu. Artíkulo 7:26 insiso 2 konhunto ku artíkulo 7:6 insiso 2 Kódigo Sivil por desviá for di e regla di 50% den kasonan partikular, kaminda ta hasi un palabrashon individual ku e konsumidó, kual no mag forma parti di e kondishonnan general mará na un kompra sigun Buki 6 di nos Kódigo Sivil.

Por ehèmpel:

Konsumidó X ta bai kasa i e ta laga un kosturera famoso kose su trahe di kasamentu na un manera spesial manera semper el a soña.

Den e promé kombersashon ku konsumidó X tabatin ku e kosturera, e kosturera ta indiká ku lo e kuminsá kose e trahe na momentu ku e risibí e pago kompletu di e trahe di kasamentu. Dor di hasi esaki e kosturera ke prevení ku Konsumidó X ta kambia di desishon, i e komo kosturera ta keda ku un trahe úniko i ku e probablemente lo no por bende niun otro hende e trahe tampoko. Den e kaso aki si Konsumidó X mester bai akuerdo ku e pago komo un palabrashon individual, esaki ta kuadra ku artíkulo 7:26 insiso 2 di nos Kódigo Sivil konhunto ku artíkulo 7:6 insiso 2 di nos Kódigo Sivil.

Regularmente Fundashon pa Konsumidó ta haña preguntanan serka konsumidónan tokante di nan derechi i deber na momentu di sera un kontrato pa haña un produkto òf servisio serka un komersiante. E biaha aki nos ta trata e siguiente pregunta: "Ki ora mi mester paga e preis di un produkto òf servisio kompletu?"

"E BENDEDÓ POR EKSIGUÍ KU MI MESTER PAGA E PREIS KOMPLETU DELANTÁ?"