Konsumidó Alertá Volumen 23, febrüari 2016 - Page 7

NOTISIA

Consumers International ta para ketu prinsipalmente na e echo ku tin mal uso di antibiótika den agrikultura, esaki sigur pa loke ta trata krio di bestia. Mal uso di antibiótika den agrikultura por kontribuí grandemente den minimalisá efektividat di antibiótikonan ku por kombatí infekshonnan di bakteria. Esaki ta nifiká por ehèmpel, si un persona ku tin un infekshon di bakteria haña un antibiótika, e antibiótika por keda sin funshoná pa motibu ku e ta karga bakterianan resistente dor di a kome karni di un animal ku tabata karga bakterianan resistente òf pasobra e tabata den kontakto ku un animal ku ta karga bakteria resistente.

Tin diferente faktor ku ta kousa resistensia kontra antibiótika. Tin bakteria ku tin resistensia pa sierto tipo di antibiótika di naturalesa, pero tambe tin otro tipo di bakterianan ku ta krea resistensia pa un antibiótika den transkurso di tempu. E bakterianan aki por krea resistensia pa motibu ku nan a wòrdu eksponé regularmente na antibiótika, pa motibu di uso di un dósis di antibiótika no fuerte pa kombatí un infekshon di bakteria òf pa motibu di uso inkorekto di antibiótika den medisina humano òf agrikultura. Loke tambe ta un faktor di preokupashon ta e echo ku e proseso pa produsí remedinan nobo no ta kana lihé sufisiente pa por yuda den e preservashon di antibiótikanan eksistente.

Consumers International ta mustra ku kadenanan di restorant multinashonal ta den un posishon faborabel pa por forsa un kambio den e uso di antibiótika den sektor di agrikultura, muchu mas lihé ku kualke kambio den lei. Ku mas ku 100.000 restorant rònt mundu, entre otro McDonalds, Subway i KFC por tin influensia signifikativo riba e demanda di karni na mundu. Segun Consumers International, e restorantnan aki tin e kapasidat pa bende solamente karninan ku no a wòrdu tratá riba un base rutinario ku antibiótika ku ta wòrdu usá pa remedi humano. E akshon aki na su turno mester kondusí agrikultornan na mehorá standardnan pa evitá i eliminá uso no nesesario di antibiótika. Di e manera aki agrikultornan por yuda preservá efektividat di remedinan esensial pa hende.

Restorantnan ‘fast food’

ANTIBIÓTIKA FOR DI BOSO MENÚ!

KONSEKUENSIA DI MAL USO DI ANTIBIÓTIKA DEN AGRIKULTURA

KOUSA DI RESISTENSIA KONTRA ANTIBIÓTIKA

KITA