Konsumidó Alertá Volumen 23, febrüari 2016 - Page 6

Resistensia kontra antibiótika ta nombrá komo un di e sinkuenta rísikonan global den e rapòrt di e Foro Ekonómiko Mundial di Riesgonan 2013. Esaki debí na e impakto ku e por tin riba salubridat públiko na nivel mundial. Consumers International i World Health Organisation ta premirá si paisnan rònt mundu no tuma medidanan di prekoushon nesesario pa kombatí resistensia kontra antibiótika, mundu por bai bèk den un époka kaminda ta bira difísil òf kasi imposibel pa kombatí infekshonnan di bakteria. Segun e organisashonnan aki, oumento di resistensia kontra antibiótika por okashoná oumento di gastunan den salubridat públiko rònt mundu, oumento den estadia na hospital i tambe oumento den kantidat di hende ku ta muri a kousa di infekshonnan di bakteria den futuro.

Fundashon pa Konsumidó ta den ful preparashon pa Dia Mundial di Derechinan di Konsumidó. E aña aki, un biaha mas, nos ta uni forsa ku organisashonnan di konsumidó internashonal, ku ta asosiá na Consumers International, pa pone un tema di sumo importansia pa bienestar di konsumidónan den spòtlait. E aña aki nos ta elaborá riba e tema “Resistensia kontra antibiótika”.

E aña aki Fundashon pa Konsumidó a skohe pa informá konsumidónan na Kòrsou kiko ta resistensia kontra antibiótika. Den esaki nos ke para ketu riba e impakto ku resistensia kontra antibiótika por tin riba salú di hende i riba salubridat públiko. Nos ke konsientisá konsumidónan ku nan tambe por duna un granito den e kombate kontra resistensia di antibiótika. Tur konsumidó konsiente por yuda den e lucha pa mantené efektividat di antibiótikonan, dor di tene nan mes na algun punto básiko.

Fundashon pa Konsumidó lo selebrá Dia Mundial di Derechinan di Konsumidó 2016 ku un kampaña informativo. E kampaña lo konsistí di un programa kòrtiku informativo i un foyeto di informashon. Pa medio di e programa ku lo pasa na diferente radio emisora i planta di televishon, Fundashon pa Konsumidó lo ilustrá/splika kiko ta resistensia kontra antibiótika i su impakto riba salubridat públiko. E foyeto di informashon lo ta disponibel na diferente sitio públiko manera botika, ofisinanan di dòkter, supermerkadonan etc.

UN MENASA PA SALUBRIDAT PÚBLIKO!

KU KAMPAÑA INFORMATIVO

DIA MUNDIAL DERECHINAN DI KONSUMIDÓ 2016

RESISTENSIA KONTRA ANTIBIÓTIKA

FUNDASHON PA KONSUMIDÓ