Konsumidó Alertá Volumen 23, febrüari 2016 - Page 3

seguridat

di kalidat di produkto i servisIo

Editorial

PRÓLOGO

Fundashon pa Konsumidó ya pa añanan a bin ta hasi su komparashonnan di preis pa asina hasi transparente na unda un konsumidó por haña su produktonan na un mihó preis. Komparashon di preis ta algu totalmente diferente for di kòntròl di preis, ku ta trabou di nos gobièrnu. Nos tin Inspekshon Ekonómiko, Inspekshon di Salubridat i G&Gz entre otro pa hasi kòntròlnan a base di nos leinan eksistente ku ta protehá konsumidónan di Kòrsou.

Pero no solamente tin un diferensia entre kompará i kontrolá, tambe ta eksistí un diferensia esensial entre kontrolá i investigá. E departamentonan di inspekshon ariba menshoná tin e meta prinsipal pa, a base di reglanan eksistente, kontrolá si un komersiante ta tene su mes na regla. Manera reglanan di pèrmit di higiena òf di establesimentu, preisnan máksimo òf reglanan di etikèt i salubridat. Na Kòrsou nos ta karesé di un instituto outónomo ku por investigá i sanshoná aktonan di un komersiante ku ta trese nos seguridat den peliger ora nos usa un produkto òf servisio ku nos kumpra serka e komersiante.

Kuantu di nos a yega di kumpra un kuminda riba kaya pa despues bira malu. Òf ta sinti manera bo karchi di telefòn a kaba promé bo a hasi un yamada na drechi. Òf simplemente tin duda grandi tokante e spit di bo internèt òf e aña di fabrikashon di bo outo? Hopi biaha ta kasonan den kua e produkto òf servisio ta funshoná, pero ni abo konsumidó ni un instansia di inspekshon no por kontrolá e kalidat di e produkto ku bo ta paga bo plaka p’e.

Si nos habri radio òf wak televishon, tur dia tin reklamo di falta di kòntròl. Personalmente ami no ta kere ku ta solamente falta di kòntròl tin na Kòrsou. Pa bo por kontrolá mester tin regla. E regla mester stipulá normanan. I mester tin un partido ku su trabou ta dediká na hasi esaki. Ku hèrmèntnan nesesario i outoridat independiente pa por hasi investigashonnan transparente, asina tin duda na kalidat di un produkto òf servisio ku nos kumpra i usa.

Mi ta konvensí ku un Outoridat di Kompetensia i Konsumidó lo trese e transparensia nesesario aki i lo tin un efekto positivo riba komportashon general di komersiantenan na Kòrsou. Un outoridat independiente di polítika, ku un base legal pa kontrolá, investigá, koregí, sanshoná i proponé kambionan di lei na gobièrnu, ta e instrumento prinsipal ku nos komunidat mester pa hisa kalidat di tur produkto i servisio ku nos ta kumpra. Sea ta komestibel, outo, seguro, internèt, un biahe òf un fiansa òf hipotek.

Marc Marshall

Direktor Fundashon pa Konsumidó